«Joǵarǵy qatarda sol jaqtan: Tilektes Meıramov, Ánýar Boranbaev, Ýaıs Sultanǵazın, Tómengi qatarda: Quman Tastanbekov, Asanáli Áshimov, Qudaıbergen Sultanbaev. 1975 jyl» delinipti astynda.
«Mańdaıy jarqyrap týǵan» degen tirkes bar qazaqta. Nıeti tarylǵan kisisine kóńili tolmaǵanda, «mańdaıyń netken tar edi» dep jatady ǵoı. Adam teginde jaqsylyqty basynyń aldyńǵy bóligimen nemese mańdaı tusymen oılaı ma eken álde. Kim bilipti?
Qaz-qatar turǵan qazaq teatry men kıno óneriniń juldyzdarynyń árqaısysy Halyq ártisi álde Qazaqstannyń eńbek sińirgen ártisi. Resmı ataǵy bolmaǵan jaǵdaıda da solaı ataýǵa ábden laıyqty. Tómengi qatarda soldan birinshi Quman Tastanbekov pen Asanáli Áshimov – qazaqtyń máńgi jas Tólegeni men Bekejan batyry. Ulttyq kıno tarıhynan «Qyz Jibekti» alyp tastasa ne qalar edi degen oı keledi keıde. Árbir detali ulttyń janyndaı seziledi. Biz Bekejandy ulttyq batyr retinde qabyldaýymyz kerek, kınoda da solaı, el shetine kelgen jaýdy jeńip keledi.
Asanáli aǵanyń sol jaǵyndaǵy «Tamashanyń» tarlany Qudaıbergen Sultanbaevty kim bilmeıdi? HH ǵasyrdyń keıingi shıreginen «Tamashany» alyp tastasańyz, taǵy da túk qalmaıdy. Oıyn-saýyq otaýyn el asyǵa kútetin.
Bul úsh birdeı tarlannyń sońynda taǵy sondaı úsh myqty. Tilektes Meıramov pen Ánýar Boranbaevtyń eńbegi qazaq teatry men kınosyna ábden sińgen. Ýaıs Sultanǵazın qoltańbasy teatr men «Tamashada» birdeı qalǵan qaıtalanbas óner ıesi. Qysqasy, qarys mańdaı bular bir-birinen asyp túsip jatpasa, kemiteri joq. Halyq rýhy men sana-sezimin kóterýge ólsheýsiz ter tókken birtýar sańlaqtardyń osylaı toqaılasyp fotoǵa túsýiniń ózi kezdeısoq emes.
