Vıse-mınıstr Dmıtrıı Mýn memlekettik qyzmetterdiń sıfrlyq formatqa kóshý barysy týraly keń kólemde baıandady. Onyń aıtýynsha, sıfrlyq transformasııa – bul jańa tehnologııalardy engizý ǵana emes, halyqtyń kúndelikti ómirin jeńildetýdiń naqty quraly. Keıingi tórt jylda memlekettik organdardyń 1 500-den astam bıznes barysy qaıta qaralyp, olardyń basym bóligi ońtaılandyrylǵan. «Biz júrgizip jatqan reınjınırıngtiń basty maqsaty – azamattar úshin qyzmetti jeńildetý, qolmen jasalatyn operasııalardy qysqartý jáne avtomattandyrý deńgeıin arttyrý. Buryn qaǵazbastylyq kóp bolatyn, búginde kóptegen qyzmet tolyqtaı onlaınǵa kóshirildi», dedi Dmıtrıı Mýn.
Mysaly, buryn talapkerler qujat jınap, ýnıversıtetke baryp ótkizýge mindetti bolsa, qazir barlyǵy eGov portaly arqyly onlaın júrgiziledi. «Abıtýrıentterge jataqhanaǵa ótinish berý, emhanaǵa tirkelý sekildi birneshe bólek rásimdi oryndaýǵa týra keletin. Qazir bul qyzmetterdiń barlyǵy proaktıvti túrde usynylady. Nátıjesinde, stýdentter men ata-analardyń ýaqyty men qarjysy únemdeldi. Naqtyraq aıtsaq, jylyna 380 mıllıon teńgeden astam qarjy únemdelip otyr», dedi vıse-mınıstr.
Sondaı-aq jol-kólik oqıǵalaryn rásimdeýde «Eýroprotokol» júıesi engizildi. Endi jeńil apattardy polısııa shaqyrmaı-aq, mobıldi qosymsha arqyly tirkeýge bolady. «Buryn saqtandyrý tólemin alý úshin 40 kúnge deıin ýaqyt qajet bolsa, qazir bul merzim 5 kúnge qysqardy. Jyldyń alǵashqy jartysynda 3 myńnan astam azamat osy qyzmetti paıdalanǵan. Bul – halyqtyń sıfrlyq sheshimderge degen senimi artqanyn bildiredi», dep atap ótti D. Mýn.
Sonymen qatar azamattardy boryshkerler tiziminen shyǵarý rásimi de tolyq avtomattandyrylǵan. Buryn jeke sot oryndaýshylaryna shyǵyndalyp, uzaq kútý qajet bolsa, qazir bári onlaın júzege asady.
Sıfrlandyrý tek áleýmettik jáne qarjylyq salada ǵana emes, ekologııada da tıimdiligin kórsetip otyr. Orman órtin erte anyqtaý úshin Kókshetaý men Býrabaı ulttyq parkterinde, Ertis ormany men Medeý óńirinde 148 beınebaqylaý kamerasy ornatylǵan. «Bul tehnologııa órtti úsh ese jyldam anyqtaýǵa, janý aýmaǵyn 20 esege azaıtýǵa jáne shyǵyndardy 15 esege qysqartýǵa múmkindik berdi. Mundaı sheshimder tabıǵatty qorǵaý isinde de tıimdilikti arttyryp otyr», dedi vıse-mınıstr.
Sondaı-aq «Smart Data Ukimet» platformasy arqyly búginde 45 memlekettik qyzmet proaktıvti formatqa kóshirilgen. Azamat ótinish bermeı-aq, memleket ózi qyzmetti avtomatty túrde usynady. Máselen, kópbalaly analarǵa járdemaqy taǵaıyndaý, jumyssyz qalǵandarǵa tólem rásimdeý nemese mekteptegi ystyq tamaqqa jeńildik berý sııaqty qyzmetter aqysyz ári onlaın kórsetiledi. Tek keıingi aılarda ǵana halyqqa 4 mıllıonnan astam proaktıvti qyzmet usynylypty. Qazirgi kezde halyqqa qyzmet kórsetý ortalyqtaryna túsetin júktemeni azaıtý maqsatynda eń kóp suranysqa ıe 10 qyzmet onlaın formatqa kóshirilip jatyr. Qazirdiń ózinde jeke kýálikti aýystyrý, ESQ alý, júrgizýshi kýáligin rásimdeý múmkindigi iske qosylǵan. Vıse-mınıstrdiń aıtýynsha, bul ózgeristerdiń nátıjesinde HQKO-ǵa baratyn azamattardyń sany eki esege azaıady.
