Osy joly mundaǵy halyq kúıshi-kompozıtorlarynyń aty-jónderi qashalǵan úlken eskertkish taqtaǵa Qazaqstannyń eńbek sińirgen qaıratkeri, kúıshi-kompozıtor, professor Orynbaı Dúısen esimi jazyldy. Byltyr dúnıe salǵan kúıshiniń qazaq kúı óneri men mýzykasyna eńbegi sińgenin kózi qaraqty el bilse kerek.
Atalǵan is-sharany uıymdastyrýshy "Kúı anasy" qorynyń jetekshisi, qoǵam qaıratkeri Tólegen Qýanyshev mazmundy jıyn ashylýynda máıekti oı aǵytty.
- Tirshiliginde ult ónerine ólsheýsiz eńbek sińirip, qasıetti kúı ónerin dáriptep qana qoımaı, júzdegen dombyrashy, kúıshiler tárbıelegen, kúı óneriniń shyn mánindegi nar tulǵasy Orynbaı Dúısen esimi qandaı qurmetke bolsyn laıyq. Sondyqtan óner ıesiniń esimi qazaq halqyna dańqy jaıylǵan kúıshiler qataryna qashalýy zańdylyq dep bilemiz. Igilikti is Qurmanǵazy atyndaǵy konservatorııasy ǵylymı keńesiniń sheshimi negizinde Astana qalasy Mádenıet basqarmasy, Almady aýdany basshylarynyń, Nurlan Bekenov bastaǵan shákirtteriniń qolǵa alýymen júzege asyrylyp otyr, - dedi Tólegen Qýanyshev.
Qurmanǵazy, Abyl, Qazanǵap syndy uly kúıshiler murasyn sheber oryndaýymen qatar, Orynbaı Dúısenniń avtorlyq shyǵarmalary óz aldyna bir tóbe. Avtordyń "Otpantaý" kúıin shákirti Tabys Qudaıbergen naqyshyna keltirip dombyrada kósiltti. Tarıh ǵylymdarynyń doktory, professor Búrkit Aıaǵan mundaı uly kúıshiler qataryna engen Orynbaı esimi úshin qýanyshyn bildirdi.
Kúıshi, dombyrashy Aıtjan Toqtaǵan Orynbaı baýyrynyń dúnıeden erte ketkenine ókinish bildirip, Astanada alǵashqylardyń biri bop JOO-da dombyra bólimin ornyqtyrýǵa kúsh salǵanyn eske alyp, eńbegin joǵary baǵalady.
Is-shara barysynda basqa da zııaly qaýym ókilderi sóılep, halyq kompozıtorlarynyń kúıleri tartyldy.
