Jarma aýdany Shar qalasynyń P.Karelın atyndaǵy mektep oqýshylaryna kásipker Baqyt Serikqyzy kómek kórsetti. Atap aıtqanda, B. Ákishova 7 oqýshyǵa 10 myń teńge mólsherinde jańa oqý jylyna arnalǵan mektep aıaq kıimin syıǵa tartty. Bul qaıyrymdylyq kómegi balalardyń mektepke tolyq daıyndyqpen barýyna óz septigin tıgizip, ata-analarǵa materıaldyq qoldaý boldy. Bilim berý uıymy kásipkerge kórsetken qamqorlyǵy men áleýmettik jaýapkershiligi úshin óz alǵystaryn bildirdi. Al Abaı garnızonyndaǵy 28738 áskerı bóliminiń jeke quramy men áskerı qyzmetshilerdiń otbasy múshelerimen jumysty uıymdastyrý qyzmeti dástúrli «Mektepke jol» aksııasy aıasynda áleýmettik jaǵynan az qamtylǵan jáne kópbalaly otbasylardan shyqqan oqýshylarǵa kómek kórsetti. Aksııa aıasynda balalarǵa mektepke qajetti qural-jabdyqtar men sómkeler tabystaldy.
– Bul ıgi is-shara áskerı bólimde jyl saıyn ótkizilip, dástúrge aınalǵan. Onyń basty maqsaty – jańa oqý jyly qarsańynda balalarǵa qýanysh syılap, olardyń sapaly bilim alýyna jaǵdaı jasaý, sondaı-aq qoǵamda qaıyrymdylyq pen janashyrlyqty nasıhattaý, – deıdi 28738 áskerı bóliminiń áskerı qyzmetshilerdiń otbasy múshelerimen jumysty uıymdastyrý qyzmetiniń basshysy Qarlyǵash Maqsutova.
Sonymen birge QMDB Abaı oblysy Zeket jáne qaıyrymdylyq qorynyń uıymdastyrýymen «Mektepke jol» qaıyrymdylyq aksııasy boıynsha 12 muqtaj otbasyǵa arnap mektepke qajet qural-jabdyqtary tabystaldy.
Aıagóz aýdandyq Qalalyq kópbeıindi qazaq mektep-gımnazııasynda «Mektepke jol» respýblıkalyq aksııasy aıasynda az qamtylǵan otbasy balalaryna jáne ataýly áleýmettik kómek alatyn otbasy balalaryna jańa oqý jylyna daıyndyq barysynda mektep qural-jabdyqtary jáne qarjylaı kómek berildi. Demeýshi azamattar 162 000 teńge qarjylaı jáne 344 500 teńgege mektep formasy, sport formasy, sómke jáne oqý quraldarymen demeýshilik jasap, oqýshylarǵa qýanysh syılady.
Sonymen qatar mektepke balalardy daıarlaýdyń erekshe úlgisin kórsetken KAZ Minerals kompanııasy boldy. Aqtoǵaı kenshileri Aıagózde Aqtoǵaı, Tarlaýly, Qopa aýyldarynda «Mektepke jol» aksııasyn uıymdastyryp, 1 015 oqýshyǵa oqý quraldaryn tabystady. Atalǵan aksııaǵa demeýshi kompanııa 19,3 mln teńge bólipti. Aksııaǵa qatysqan ata-analar alǵystaryn bildirdi.
– Oqýshylarymyz mektepke daıyn kelip jatqanyna biz de erekshe qýanyshtymyz. KAZ Minerals kompanııasy «Mektepke jol» aksııasyn jyl saıyn uıymdastyryp keledi. Búginde mektepke qajetti qural-jabdyqpen qamtylǵan oqýshylarymyzdyń kózindegi qýanyshty kórip, biz de marqaıyp qaldyq. Jergilikti jerdegi oqýshylarǵa, elimizdiń bolashaq jastaryna qoldaý bildirip jatqan Aqtoǵaı ken ornyna aıyryqsha alǵys aıtamyz, – deıdi Aqtoǵaı №6 jalpy bilim beretin orta mektebiniń dırektory Gúlzıpa Maqajanqyzy.
Abaı oblysy
