Vodnyı kentiniń balalary endi eńseli de zamanaýı ǵımaratta bilim alady. Bul – «Keleshek mektepteri» jobasy sheńberinde boı kótergen Semeı qalasyndaǵy ekinshi, al Abaı oblysy boıynsha úshinshi mektep. Úsh qabatty mektepte 28 oqý kabıneti, fızıka, hımııa, bıologııa, robototehnıka, grafıka jáne modeldeý bólmeleri, aǵash jáne metall óńdeý, tigin jáne kýlınarııa sheberhanalary bar. Sonymen qatar akt zaly, ashana, 7 zerthana, kitaphana, oqý zaly men kovorkıng aımaqtary qarastyrylǵan. Aýlada fýtbol, voleıbol, basketbol alańdary, júgirý jolaqtary men sport zaly bar.
Mektep bir aýysymda, memlekettik tilde bilim beredi. 1-11 synyp aralyǵynda 22 synyp-komplekt jáne 1 mektepaldy daıarlyq synyp ashylady. Saltanatty is-sharaǵa qatysqan aımaq basshysy ustazdar men ata-analardy, oqýshylardy aıtýly oqıǵamen quttyqtady.
«Elimizde Memleket basshysy Qasym-Jomart Kemeluly Toqaevtyń bastamasymen júzege asyp jatqan «Keleshek mektepteri» ulttyq jobasy aıasynda kóptegen jańa oqý oryndary salynyp jatyr. Bizdiń óńirimizde de birnesheýi boı kóterdi. Osyndaı keleli bastamalar arqyly balalarǵa qolaıly, qaýipsiz, zamanaýı bilim berý ortasyn qalyptastyrýǵa baǵyttalǵan júıeli qadamdy kórýge bolady. Sonyń aıqyn kórinisi – búgin Semeı qalasynyń Vodnyı kentinde boı kótergen 600 oryndyq jańa mektep. Bul – ustazdyń armanyn, ata-ananyń senimin, balanyń úmitin toǵystyrǵan ortaq qýanysh. Búgingi ashylǵan mektep – bolashaqqa degen senimniń sımvoly. Barshańyzdy jańa oqý jylynyń bastalýymen shyn júrekten quttyqtaımyn», – dedi oblys ákimi.
Aımaq basshysy mekteptiń synyptaryn, ashana, sport zaldy kórip, oqýshylarmen, muǵalimdermen pikirlesti.
«Vodnyı kentinde mundaı zamanaýı mektep bolmaǵan. Turǵyndar uzaq jyl boıy kútti. О́te qýanyshtymyz. Barlyq turǵyndardyń atynan shyn júrekten alǵys aıtamyz. Mektebimiz úlken bilim ordasy bolsyn. Túlep ushqan shákirtterimiz eldiń maqtanyshyna aınalsyn», – dedi Vodnyı kentiniń turǵyny Sovet Toǵyzbaev.
Qazirgi ýaqytta oblysta «Keleshek mektepteri» ulttyq jobasy aıasynda eki mektep salynyp jatyr. Aıagóz qalasyndaǵy 600 oryndyq mektep 2-inshi toqsanda paıdalanýǵa berilmek. Semeıdiń Shyǵys kentinde 300 oryndyq mekteptiń qurylysy júrgizilýde. Jalpy oblystaǵy 8200 oryn tapshylyǵynyń 31 paıyzy osy jobamen salynyp jatqan 5 mektep esebinen sheshilmek. Qalǵan tapshylyqty joıý úshin respýblıkalyq bıýdjet esebinen aldaǵy úsh jylda 11 mektep salý josparlanǵan.
Apatty jaǵdaıda dep tanylǵan úsh mekteptiń máselesi de kezeń-kezeńimen sheshilip keledi. Jarma aýdanynyń Sýyqbulaq aýylynda 100 oryndyq jańa mekteptiń qurylysy bastaldy. Aqsýat aýdanyndaǵy Ekpin aýylynda 300 oryndyq mekteptiń qurylysy bastalady. Semeıdegi №11 mekteptiń ornyna jańa mektep salýǵa qujat ázirlenip jatyr.
Abaı oblysynda 304 mektep bar. Bilim oshaqtarynda 101 myńnan astam bala bilim alady. 12 myńnan astam ustaz eńbek etedi. Bıyl 10 myńnan asa búldirshin alǵash ret 1-synypqa barady.
SEMEI
