Foto: parlam.kz
Depýtattyń sózinshe, Prezıdent Qasym-Jomart Toqaev Joldaýynda elimizdegi áýejaılardyń áleýetin tolyq paıdalanýdy tapsyrǵan bolatyn. Buǵan qosa, Memleket basshysy 2022 jyly Pavlodar oblysyna sapary barysynda Pavlodar áýejaıyndaǵy ushý-qoný jolaǵyn jóndeýdi naqty mindettegen edi.
«Pavlodar oblysy – elimizdiń iri ındýstrııalyq aımaǵynyń biri. Munda aýyl sharýashylyǵy salasy da qarqyndy damyp keledi, týrızmniń áleýeti de joǵary. О́ńirge kelip-ketetin azamattar sany jyldan jylǵa artyp keledi. Sonyń ishinde iskerlik maqsatta saparlaıtyn otandyq jáne sheteldik ınvestorlardyń úlesi de kóbeıýde. Ásirese, qysqy mezgilde kólik qatnasy qıyndaǵan tusta jurtshylyqqa ushaqpen qatynaýǵa qajettilik arta túsedi. Osyndaı jaǵdaıda áýe qatynasynyń qoljetimdiligi men qaýipsizdigi aıryqsha mańyzǵa ıe ekeni anyq», dedi Jarqynbek Amantaıuly.
Onyń aıtýynsha, jobanyń jalpy quny – 16,9 mlrd teńge, aıaqtalý merzimi 2024-2025 jyldarǵa belgilengen. Qazirgi tańda jumystardyń 44 paıyzy oryndaldy: ushý-qoný jolaǵy, perron men rýlejdik jolaqtardyń jabyndysy frezerlendi, jer jumystary júrgizildi, drenajdyq júıe ornatylyp, beınebaqylaý men qorshaý montajy bastalǵan. Sonymen qatar shamamen 5 mlrd teńgege materıaldar men jabdyqtar satyp alyndy.
Alaıda jobany tolyq aıaqtaý úshin qosymsha 9,3 mlrd teńge qajet. Depýtattyń aıtýynsha, Pavlodar oblysynyń ákimdigi bul másele boıynsha Kólik mınıstrligine resmı hat joldaǵanymen, tolyq qarjylandyrý áli bólingen joq.
«Pavlodar áýejaıyndaǵy ushý-qoný jolaǵyn qaıta jańǵyrtý – tek aımaq úshin ǵana emes, búkil elimizdiń áleýmettik-ekonomıkalyq damý kórsetkishi úshin mańyzdy joba. Bul óńirdiń ınvestısııalyq tartymdylyǵyn arttyryp, eksporttyq áleýetin keńeıtedi, kólik-logıstıkalyq ınfraqurylymdy jetildiredi jáne eń bastysy halyqtyń qaýipsiz ári qolaıly áýe qatynasyna qol jetkizýine múmkindik beredi. Osyǵan baılanysty jobany aıaqtaýǵa qajetti qosymsha qarjy bólinýi tıis», dedi Jarqynbek Amantaıuly.
