Qostanaıda Qazaqstan men Reseı prezıdentteri týraly kitaptyń tusaýkeseri ótti

QOSTANAI. 23 maýsym. Qostanaıda jýrnalıst, aýmaqtyq «Kostanaıskıe novostı» gazetiniń bas redaktory, áleýmettaný ǵylymdarynyń doktory Sergeı Harchenkonyń «Eki el, eki taǵdyr, bir maqsat» («Dve strany, dve sýdby, odna sel») atty kitabynyń tusaýkeseri ótti. Oǵan tarıhshylar men áleýmettanýshylar, fılosoftar, zııaly qaýym ókilderi jáne jýrnalıster shaqyryldy. Bul týraly egemen.kz tilshisi habarlady. Sergeı Harchenkonyń «Eki el, eki taǵdyr, bir maqsat» kitaby bıyl Máskeýdiń «Pero» baspasynan jaryq kórgen bolatyn. Kitaptyń ereksheligi, onyń teń jartysy Qazaqstan Prezıdenti Nursultan Nazarbaevtyń, ekinshi jartysy Reseı Prezıdenti  Vladımır Pýtınniń ómir joly, qyzmeti, memlekettik, qoǵamdy qaıratkerligine arnalǵan. Kitap eki jaqtan da paraqtalady. Avtor «Nursultan Nazarbaev: Ult kóshbasshysy, eýrazııalyq oıshyl» degen bólimde Elbasy fenomenine úńiledi. Onyń ósý jolyn, ómirin, shyqqan ortasyn aıta otyryp, iri saıasatker bolyp qalyptasýyndaǵy alǵy sharttardy kórsetedi. «Barlaýshy, saıasatker, patrıot» degen bóliminde Reseı Prezıdentiniń qalyptasýyn áńgimeleıdi. Avtor eki bólimde de kórshi eki iri eldiń Prezıdentterin  álemdik saıasatker tulǵalarmen qatar qoıady, ony dáleldeıdi. Tusaýkeserde kitap týraly jyly lebizder aıtyldy. Qazaqstannyń Eńbek Eri Saıran Buqanov: «Memlekettiń damýy men nyǵaıýynda onyń basshylaryna kóp nárse baılanysty. Keńes Odaǵy ydyraǵannan keıin barlyq respýblıkalar úshin ońaı bolǵan joq, barlyǵy da qıyn ýaqyttan ótti. Bizdiń Elbasyǵa barlyǵyn qaıtadan qurý, damýdyń jolyn tańdaý ońaı bolmaǵany belgili. Ekonomıkalyq baılanystar úzilip, qalaı júrýdi bilmeı daǵdarǵanda tyǵyryqtan jol tapty. Eń bastysy elde saıası daǵdarysqa jol bermedi. Mysaly, Baıqońyr máselesin sheshý, elimiz Astanasyn kóshirý, jańa qala kóterý   sekildi iri máseleler sheshimin tapty. Sonyń barlyǵynyń eń aýyr júgi Elbasynyń ıyǵyna túskenin bilemiz. Kitapta osynyń barlyǵy pýblısıstıkalyq sıpatta ádemi berilgen. Biz Elbasyny barlyǵymyz jaqsy bilemiz dep oılaımyz, al shyn máninde osy iri tulǵa jóninde bilmeıtinimizdiń óte kóp ekenin Sergeı Vasılevıchtiń jańa kitabyn paraqtaǵanda aıqyn sezinemiz», dedi. Kitap avtory Sergeı Harchenko tusaýkeserde jınalǵandarǵa jáne kitap jóninde pikir bildirgenderge rahmet aıtty jáne bul taqyrypqa barǵan sebebinen de kópshilikti habardar etti. Sergeı Harchenko: «Máńgi kórshi elmiz, áriptespiz. Qazir óte kúrdeli ýaqytta ómir súrip otyrmyz. Mundaıda biz Prezıdentimizdi qoldaýymyz kerek. Men osy jóninde Reseıdegi jaǵdaılarǵa renjımin. Men negizi oppozısııalyq pikirlerge qarsy emespin,. Oppozısııa da eldiń damýyna, bolshaǵyna múddeli bolýy jáne Prezıdentke bir máseleniń balama túrin usynyp otyrýy, óziniń pikirin bildirýi tıis. Oppozısııalyq baǵyt ol Prezıdentin syılamaı, qaralaý degen sóz emes» dedi. Kitap jalpy kópshilikke arnalǵan. Onyń 300 danasy oblys kitaphanalaryna taratyldy. Názıra Járimbetova. Derek, sýret: egemen.kz