Sýret: mpe.uz
Qazaqstan Prezıdenti almaǵaıyp zamanda kóshten qalmas úshin jetken jetistikterge toqmeıilsimeı, únemi alǵa umtylý, umtylǵanda da ozyq oı, ónegeli ózgeris, salıqaly saıasat qajet ekenin jaqsy túsinedi. Sóz ben istiń birligi ǵana eldi órkenıetke bastaıdy.
Qasym-Jomart Toqaev bul joly da aımaq basshylarynyń aldyn orap ketti. Ýnıtarly memleketke qos palataly parlamenttiń qajet emes ekeni týraly pikirler О́zbekstanda da únemi aıtylyp júr. Alaıda ot basy, oshaq qasynan ári asqan joq. Qazaqstan Prezıdenti bir palataly Parlament qurý ıdeıasymen aımaqty, onyń ishinde О́zbekstandy saıası dıskýrsyn qaıta qaraýǵa úndeıtini haq.
О́zbekstannyń buqaralyq aqparat quraldarynda Qasym-Jomart Toqaevtyń Joldaýy týraly aqparattar tolassyz jarııalanyp jatyr. Ásirese bir palataly Parlament qurý ıdeıasy ózbekstandyqtarda erekshe qyzyǵýshylyq týǵyzdy.
О́zbekstandaǵy bedeldi «Daryo.uz» portaly «Qazaqstan Parlamenti bir palataly bolýy múmkin» degen taqyryppen maqala jarııalady. «Prezıdent bul óte kúrdeli másele ekenin, ony sheshýde asyǵystyqqa jol bermeý kerektigin basa aıtty. Sondyqtan ony azamattyq qoǵamda, sarapshylar arasynda, qazirgi Parlamentte talqylaý qajet dedi», dep jazylǵan maqalada.
«Qalampir.uz» portaly bolsa, «Q.Toqaev Konstıtýsııany ózgertýdi usyndy» degen materıalynda Qazaqstan Prezıdentiniń bir palataly Parlament qurý ıdeıasyna basa nazar aýdardy. «Qazaqstan Prezıdenti Qasym-Jomart Toqaev respýblıkany qos palataly Parlamentten bir palataly Parlamentke kóshirý úshin parlamenttik reformany usyndy. Bul máseleni 2027 jyly ótetin Konstıtýsııaǵa ózgerister engizý jónindegi referendýmǵa shyǵarý kerek. Bul týraly Prezıdent búgin, 8 qyrkúıekte Parlamentte halyqqa Joldaýynda málimdedi», dep jazdy portal.
Sondaı-aq atalǵan portal referendýmǵa, Q.Toqaevtyń qyzmetine sholý jasady.
«Referendým 2027 jyly ótetin bolsa, bul Toqaevtyń prezıdenttigi tusyndaǵy úshinshi referendým bolmaq. Birinshisi 2022 jyly boldy, ol kezde Konstıtýsııaǵa ózgerister engizý arqyly bir adamnyń bir merzimnen artyq el prezıdenti bolýyna tyıym salynyp, prezıdenttik merzimi jeti jylǵa deıin uzartyldy. Toqaev tusyndaǵy ekinshi referendým 2024 jyly ótti, onda Qazaqstanda AES salý máselesi talqylandy», dep jazady maqala avtory.
Bul – sózimizdiń basynda aıtqan Q.Toqaevtyń Joldaýlary, bastamalary únemi ózbekstandyqtardyń basty nazarynda ekeniniń aıǵaǵy. Taǵy bir aıta ketetin jaıt, aty aıtyp turǵandaı bul portal negizinen synı materıaldar jarııalaıdy. Alaıda Q.Toqaevtyń Joldaýy týraly materıaldyń Qazaqstan Prezıdentine erekshe qurmetpen jazylǵany kórinip tur.
Sh. Mırzııoev bılikke kelgen soń ashylǵan, Jańa О́zbekstan (Iаngı Ўzbekıston) tynys-tirshiligin jarııalaıtyn «Yuz.uz» portaly Qasym-Jomart Toqaevtyń Jasandy ıntellekt jáne sıfrlyq damý mınıstrligin qurý, Qazaqstan Respýblıkasy Bas prokýratýrasynyń Aktıvterdi qaıtarý jónindegi komıteti endi Investorlar quqyǵyn qorǵaý komıteti dep atalatyny jónindegi bastamalardy taratyp jazdy.
Qazaqstan halqynyń bolashaǵyna baǵyt-baǵdar beretin el Prezıdentiniń osy jylǵy Joldaýy halyqtyń yntymaǵyn nyǵaıtyp, olardyń muń-muqtajyn tyńdap qana qoımaı, sol qajettilikterdi sheshýge aıqyn is-áreketter kórsetilgen Joldaý dep aıtýǵa bolady.
Baýyrlas el retinde ózbekstandyqtar da Qasym-Jomart Toqaevtyń saıası sheshimderin qoldap, barlyq bastamasynyń iske asýyna tilektestik bildiredi.
Begabat UZAQOV,
jýrnalıst
