Sýret: instagram.com/mfa_kz
Sapar barysynda Murat Nurtileýdi Pákistan Prezıdenti Asıf Alı Zardarı qabyldap, taraptar ekijaqty yntymaqtastyqtyń qazirgi ahýaly men damý bolashaǵyn talqylady. Suhbat barysynda A.Zardarı keıingi jyldary ornaǵan senimdi saıası dıalogti joǵary baǵalap, strategııalyq salalardaǵy kooperasııany tereńdetýge múddelilik bildirdi. О́z kezeginde Qazaqstan SIM basshysy Astana tarapynan jan-jaqty seriktestikti damytýǵa daıyn ekenin rastap, birqatar áleýetti jobalardan habardar etti.
– Qazirgi tańda elderimiz arasyndaǵy saýda-ınvestısııalyq qatynastarda oń úrdisterdi baıqap otyrmyz. Qazaqstan Pákistanmen ekonomıkalyq yntymaqtastyqty odan ári nyǵaıtýǵa múddeli, – dep málimdedi M.Nurtileý.
Bul turǵyda taraptar kólik-logıstıkalyq baılanysty damytýdy, ekijaqty bilim berý bastamalaryn qoldaý arqyly eki eldiń joǵary oqý oryndary arasyndaǵy akademııalyq yntymaqtastyqty nyǵaıtýdy, mádenı-gýmanıtarlyq qatynastardy odan ári ilgeriletýge erekshe nazar aýdardy.
Mınıstr Murat Nurtileý Pákistan Premer-mınıstriniń orynbasary – Syrtqy ister mınıstri Muhammad Ishaq Darmen de kelissózder júrgizdi. Taraptar saýda-ekonomıkalyq, kólik, logıstıka, energetıka, aýyl sharýashylyǵy jáne IT salalaryndaǵy ózara is-qımyl máselelerin saralady. Sondaı-aq basqosýda aldaǵy jyldary taýar aınalymyn 1 mlrd dollarǵa deıin jetkizý jónindegi maqsatqa qol jetkizý úshin praktıkalyq sharalar qabyldaýdyń mańyzyn atap ótti. Sonymen qatar kóliktik ózara baılanysqa jáne tranzıttik logıstıkanyń tıimdiligin arttyrýǵa erekshe kóńil bólindi.
– Pákistan – Ońtústik Azııadaǵy ýaqyt synynan ótken dosymyz ári mańyzdy seriktesimiz. Eki el arasynda joǵary deńgeıdegi baılanystardy qosa alǵanda, mazmundy saıası dıalog jolǵa qoıylǵan, – dedi M.Nurtileý.
Al Pákistannyń Syrtqy ister mınıstri Islamabadtyń Astanamen praktıkalyq baılanysyn keńeıtýge múddeliligin jetkizdi.
– Elderimiz saýda-ekonomıkalyq jáne gýmanıtarlyq salalardaǵy ózara is-qımyl úshin aıtarlyqtaı áleýetke ıe. Biz halyqtarymyzdyń turaqty ári gúldengen bolashaǵy úshin birlesken kúsh-jigerge jańa serpin berý úshin jumys isteýge daıynbyz, – dedi M.Dar.
Qos el óńirlik jáne jahandyq kún tártibi, onyń ishinde BUU, AО́SShK, ShYU, IYU sheńberindegi dıalog, sondaı-aq eki memlekettiń halyqaralyq bastamalaryn ilgeriletý kezinde ózara qoldaý kórsetý máseleleri boıynsha «saǵattardy teńestirdi». Kezdesý qorytyndysynda 2025–2026 jyldarǵa arnalǵan Qazaqstan men Pákistan Syrtqy ister mınıstrlikteri arasyndaǵy birlesken is-qımyl josparyna qol qoıyldy. Bul qujat aıasynda taraptar saıası dıalogti jalǵastyrýǵa, basym sektorlardaǵy birlesken jobalardy jandandyrýǵa jáne beıindi memlekettik organdar arasynda tıimdi úılestirýdi qamtamasyz etýge ýaǵdalasty.
Sondaı-aq qazaq delegasııasy Pákistannyń jetekshi kompanııalarymen iskerlik kezdesýler ótkizdi. «Fauji Foundation» basshylyǵymen ótken kelissózderde aýyl sharýashylyǵy, mıneraldy tyńaıtqyshtar óndirisi, azyq-túlik jáne bank sektory boıynsha birlesken jobalardy júzege asyrý múmkindikteri qarastyryldy. Taraptar «Fauji Foundation» men «Samuryq-Qazyna» AQ arasyndaǵy yntymaqtastyqty jandandyrý jáne ony kezeń-kezeńimen júzege asyrý josparyn ázirleýde ózara saparlar uıymdastyrý jóninde kelisimge keldi.
«National Logistics Corporation» kompanııasy basshysymen kezdesýde logıstıka salasyndaǵy yntymaqtastyqty damytýǵa baǵyttalǵan naqty sharalardy aıqyndady. Qazaq delegasııasy Qazaqstan-Pákistan kólik-logıstıkalyq konsorsıýmyn qurý bastamasyn usyndy.
«TCS Logistics» kompanııasynyń tóraǵasymen júzdesýde Qazaqstanda júzege asyrylatyn aýqymdy ınfraqurylymdyq jobalarǵa qatysý múmkindigi qarastyryldy. Mınıstr Murat Nurtileý Prezıdent Qasym-Jomart Toqaevtyń tapsyrmasy boıynsha kólik-logıstıkalyq ınfraqurylymdy damytý strategııalyq basymdyq retinde aıqyndalǵanyn atap ótti. Negizgi bastamalardyń qatarynda Eýrazııa men Ortalyq Azııa naryqtaryn Pákistanmen baılanystyryp, Parsy shyǵanaǵy, Afrıka jáne Ońtústik Shyǵys Azııa elderine shyǵýǵa múmkindik beretin Aýǵanstan arqyly ótetin temirjol qurylysy bar.
Sapar qorytyndysynda qazaq delegasııasy Pákistan tarapyna qyzyǵýshylyǵy úshin alǵys bildirip, talqylanǵan bastamalardy praktıkalyq turǵyda iske asyrýǵa baǵyttalǵan konstrýktıvti dıalogti jalǵastyrýǵa daıyn ekenin rastady.
