QOSTANAI. 23 maýsym. «Ata» qory óziniń 10 jyldyq merekesin atap ótti. Saltanatqa Uly otan soǵysy, tyl jáne eńbek ardagerleri nemerelerimen birge keldi. Sonymen qatar Reseıden de qonaqtar shaqyryldy. Bul týraly egemen.kz tilshisi habarlady.
Oblys ortalyǵyndaǵy I.Omarov atyndaǵy oblystyq qazaq drama teatrynyń kórnekti zalynda «Ata» qorynyń onjyldyǵy jáne osy mereıtoıǵa arnalǵan «Qaldyrǵan izi máńgilik» atty kitap pen fılmniń tusaýkeseri ótti. Oǵan «Ata» qory qamqorlyq jasaıtyn ardagerler, qala basshylary qatysty.
«Ata» qorynyń tóraǵasy jáne jalǵyz quryltaıshysy Marat Qabdysalyqov: «Biz Uly Otan soǵysynda Otanymyzdy qorǵaǵan jáne tylda maıdan úshin tynymsyz eńbek etken, odan keıingi jyldary eńbek úlgisin kórsetken aǵa býyn ókilderi — ardagerlerimiz aldynda máńgilik qaryzdarmyz. «Ata» qory sol úshin qurylǵan bolatyn. Mine on jyl. Biz shyǵarǵan kitap pen fılmde ardagerlerimizben qatar qordyń tarıhy, on jyl boıy istegen jumysy týraly aıtylady dedi.
Jınalǵandar fılmdi tamashalady. «Ata» qory ardagerlerge áleýmettik kómek berýmen qatar, sońǵy jyldary olardyń demalysyn uıymdastyrdy. Úlken, jaıly avtobýspen qarttardy Astanaǵa, Qostanaı qalasynyń syrtyndaǵy tabıǵat aıasyna, Býrabaıǵa, Chelıabige apardy. Aýrýhanaǵa túsken qarııalarǵa dári-dármegin, tamaǵyn aparyp beretin de «Ata» qory boldy, qaraıtyny joq qarııalar o dúnıelik bolǵanda olardy sońǵy saparǵa attandyrýdy da óz moıynyna alyp otyrady. Fılmde sóılegen qarııalar «Ata» qorynyń kórsetken qamqorlyǵyn keıde óz jaqyndarynan da kórmeıtinin aqjarylyp aıtty. Mundaı qoǵamdyq qordyń elimizde balamasy joq deýge de bolady.
Saltanatta sóz alǵan oblystyq ardagerler keńesiniń tóraǵasy Kenjebek Ýkın «Ata» qorynyń jumysy qazaqstandyq patrıotızmniń bir úlgisi ekenni tilge tıek etti.
Kenjebek Ýkın: «Aramyzda uly Otan soǵysynda osy beıbit zaman úshin oq pen ot keshken 300-den asa maıdangerler jáne tylda aıanbaı eńbek etken 10 myńnan asa tyl eńbekkkerleri júr. Soǵan shúkirlik etemiz. Soǵysqa Qostanaıdan 73,5 myń adam ketip, sonyń 27 myńnan astamy qaıtyp oralmady, 16 myń jaýynger habarsyz ketti. Búgin 22 maýsym — Uly Otan soǵysynyń bastalǵan kúni. Kóńilge aýyr tıetin kún. Biz soǵys qurbandaryn umytpaýymyz, olardyń arýaǵyna taǵzym etýimiz kerek, al aramyzda júrgen maıdangerlerge qandaı qurmet te artyq emes» dedi. Kenjebek Úkiuly sonymen qatar Reseıdegi 28 panfılovshylar erligi tarıhyn joqqa shyǵarǵan qaýesetke renishin bildirdi. Ondaı áńgimeler eldiń arasyn iritýmen qatar, keıingi urpaqqa durys tárbıe bolmaıtyndyǵyn aıta kelip, eldi qorǵaý úshin janyn qıǵan atalarymyzdyń arýaǵyna qııanat ekenin de kúıine aıtty.
Saltanattan keıin «Ata» qory men oblystyq ardagerler keńesi birigip, ardagerlerge dastarhan jaıdy.
Názıra Járimbetova.
Derek, sýret: egemen.kz
