Úkimet • 12 Qyrkúıek, 2025

Abaı oblysynyń medısınasyna arnaýly qordan qarjy bólindi

1 mın

oqý úshin

Elimizde zańsyz ıemdenilgen aktıvterdi qaıtaryp, olardy áleýmettik nysandar salýǵa baǵyttaý isi jalǵasyp keledi. Sonyń aıasynda Arnaýly memlekettik qordan Abaı oblysyna densaýlyq saqtaý salasyn damytýǵa 5,6 mlrd teńge qarastyrylǵan. Qarjy óńirdiń medısınalyq ınfraqurylymyn jetildirýge jáne qyzmet kórsetý sapasyn kóterýge jumsalady, dep habarlaıdy Egemen.kz.

Qyrmyzy JUMAǴALIQYZY

Abaı oblysynyń medısınasyna arnaýly qordan qarjy bólindi

Foto: Qyrmyzy Jumaǵalıqyzy

Úkimettiń baspasóz qyzmetiniń málimetinshe, Úrjar aýylyndaǵy kópsalaly ortalyq aýdandyq aýrýhanaǵa qosymsha ǵımarat salynyp, zamanaýı jabdyqtarmen tolyqtyrylmaq. Aıagóz qalasynda da jańa korpýs boı kóterýde, ol zamanaýı magnıttik-rezonanstyq tomografpen qamtamasyz etiledi. Bul nysandardy bıyl qoldanysqa berý josparlanyp otyr.

«Jobalar azamattardy ýaqtyly jáne sapaly medısınalyq qyzmettermen qamtý aıasyn keńeıtýge múmkindik bermek.Buǵan deıin Arnaýly memlekettik qordan Semeı qalasynda 100 oryndyq medısınalyq-áleýmettik psıhonevrologııa mekemesin salýǵa 2,6 mlrd teńge bólingen bolatyn», delingen habarlamada.

Memleket basshysy Qasym-Jomart Toqaev óz Joldaýynda densaýlyq saqtaý salasyn jańǵyrtýǵa erekshe kóńil bólinip jatqanyn aıtqan edi. Qazir el kóleminde aýyldyq feldsherlik-akýsherlik pýnktterden bastap iri aýrýhanalarǵa deıin kezeń-kezeńimen jańartylyp keledi. «Aýylda densaýlyq saqtaýdy jańǵyrtý» ulttyq jobasy aıasynda 540 jańa nysan salynǵan.