2025 jylǵy 12 qyrkúıekte Qazaqstan Respýblıkasy Kólik mınıstrligi men Gonkongtyń Kólik jáne logıstıka bıýrosy arasynda áýe qatynasy máseleleri boıynsha kelissózder ótti.
Qazaqstan delegasııasyna Qazaqstan Respýblıkasy Kólik vıse-mınıstri Talǵat Lastaev, al Gonkong delegasııasyna Gonkongtyń Kólik jáne logıstıka bıýrosynyń Bas hatshysynyń kómekshisi Kelvın Ma jetekshilik etti.
Kelissózderdiń nátıjesinde, ár eldiń áýe kompanııalary úshin reıster sany aptasyna 7-den 14-ke deıin ulǵaıtyldy. Onyń ishinde aptasyna 7 reıs «aýa keńistiginiń besinshi dárejeli erkindigi» qaǵıdasy boıynsha júzege asyrylatyn bolady. Bul qazaqstandyq tasymaldaýshylar úshin Gonkong áýejaıynyń áleýetin paıdalanýǵa, sondaı-aq gonkongtyq áýe kompanııalaryna qazaqstandyq áýejaılardy qoldanýǵa múmkindik beredi.
Kelissózder barysynda gonkongtyq «Cathay» áýe kompanııasynyń ókili jańa áýe kemeleriniń kelýin eskere otyryp, Qazaqstan Respýblıkasyna tikeleı reıster ashý jospary bar ekenin jetkizdi.
Quqyqtyq bazanyń keńeıtilýi men áýe qatynasynyń qaıta jandanýy elder arasyndaǵy saýda-ekonomıkalyq, iskerlik jáne týrıstik yntymaqtastyqty odan ári damytýǵa yqpal etedi.
«Cathay» áýe kompanııasy – álemdegi eń iri jolaýshylar men júk tasymaldaýshy áýe kompanııalarynyń biri. Áýe kompanııasy álem boıynsha 100-den astam baǵytqa ushady. Ushaq parki 170-ten astam áýe kemesinen turady jáne kompanııa qazirgi tańda ushaqtar sanyn odan ári arttyrý jumystaryn júrgizýde.
