ALMATY. 23 maýsym. Almatyda «Dınamo» deneshynyqtyrý jáne sport qoǵamynyń 90 jyldyq merekesine men Aqparat jáne baılanys qyzmetkerleriniń kúnine oraı BAQ ókilderi arasynda shaǵyn fýtboldan týrnır ótti. Bul týraly egemen.kz tilshisi habarlady.
Oǵan 11 komanda qatysty. Týrnırdiń ashylý saltanatynda «Dınamo» deneshynyqtyrý jáne sport qoǵamy basqarmasynyń bastyǵy Aleksandr Knıazev, «Dınamo» dene shynyqtyrý jáne sport qoǵamy tóraǵasy orynbasarynyń keńesshisi, polkovnık Marat Qashaev pen ardager sport jýrnalısi Rabat Jánibekov «dınamolyqtardy» mereıtoıymen quttyqtap, qatysýshylarǵa sáttilik tiledi.
«Dınamo» DShSQ Baspasóz qyzmetiniń ókili Aqyn Ordabaıulynyń aıtýynsha, aptap ystyqta kúni boıy ter tókken komandalar bir-birlerimen baq synasyp, tús aýa 11 komandanyń arasynan sýyrylyp shyqqan tórt komanda jartylaı fınaldyq oıyndaryn ótkizdi. Olar «Habar», «Almaty», «Sardar» jáne «Alaman» komandalary edi.
Fınalda «Sardar» men «Alaman» komandalary kezdesti. Tartysty ótken sońǵy kezdesýde qarsylastaryn 2:0 esebimen jeńgen «Sardar saıty» komandasy týrnırdiń jeńimpazy atandy. Olar jarystyń bas demeýshisi «Global» qurylys kompanııasy ázirlegen túrli-tústi teledıdarymen marapattaldy. Júldeli úshinshi oryn «Habar» komandasyn 1:0 esebimen jeńgen «Almaty» telarnasynyń ujymyna buıyrdy.
Jarys sońynda «Úzdik oıynshy», «Úzdik qaqpashy», «Kórermenniń kózaıymy» jáne belsendi oıynshylarǵa berilgen nomınasııalar boıynsha baǵaly syılyqtar tabystaldy.
Týrnırdiń «Úzdik oıynshysy» «Almaty» telearnasynyń shabýylshysy Talǵat Qojabekov laıyq dep tabylsa, «Úzdik qaqpashy» ataǵy «Sardar saıty» komandasyn berik qorǵaǵan Dáýlet Kárimovke berildi.
«Dınamo» ardagerler komandasy da týrnırge qatysty. Al, ardagerler arasynda jastaryna qaramaı tartysty da tártipti oıyn kórsetken ataqty kommentator Dııas Omarov, belgili sport jýrnalısi Álim Anapııanov, sport sheberi Erjan Baımolda synda aq samaıly aǵalar da baǵaly sylyqtarǵa ıe boldy.
«Dınamo» deneshynyqtyrý jáne sport qoǵamy tóraǵasynyń birinshi orynbasary, jarys uıymdastyrýshysy Asqar Omarqulov týrnırdiń aldaǵy kezde de ótetinin aıtty.
Dastan Kenjalın.
Derek, sýret: «Dınamo» DShSQ.
