- Fýtboldan elimiz Premer-lıgasynyń 23-týry mynadaı nátıjelermen aıaqtaldy: «Atyraý» – «Tobyl» 1:0, «Qyzyljar» – «Oqjetpes» 3:1, «Ordabasy» – «Jeńis» 2:1, «Turan» – «Ulytaý» 1:1, «Qaırat» – «Aqtóbe» 1:0, «Astana» – «Elimaı» 3:3. Sońǵy kezdesýdegi jeńisinen keıin «Qaırat» jarys kestesinde jeke-dara kósh bastap tur. Almatylyqtardyń qorjynynda 49 upaı bar. Ekinshi oryndaǵy «Astananyń» basty qarsylastarynan eki upaıy kem. Úshinshi satyǵa jaıǵasqan «Tobylda» 44 upaı. Alaıda qostanaılyqtar ózge klýbtardan bir oıyn kem ótkizgen.
- AQSh-tyń Las-Vegas qalasynda ótken kásipqoı boks keshinde asa aýyr salmaqta synǵa túsken Ivan Dychko (15-0, 14 KO) amerıkalyq Djermeın Franklınnen (23-2, 15 KO) upaı sanymen utyldy. Bul – otandasymyzdyń sporttyq mansabyndaǵy alǵashqy jeńilisi. Jarystyń basty jekpe-jeginde AQSh-tyń dúldúli Terrens Kroýford (42-0, 31 KO) Meksıkanyń maqtanyshy Saýl «Kanelo» Alvaresti jeńip, ekinshi orta salmaqtaǵy (63-3-2, 39 KO) álemniń absolıýtti chempıony atandy.
- Parıjde uıymdastyrylǵan «Shaqyrý kýboginde» elimizdiń gımnasty Narıman Qurbanov altyn tuǵyrǵa kóterildi. Ol «at» jattyǵýynda 15,066 upaı jınap, jeńiske jetti. Kúmis, qola medaldardy armenııalyq Gamlet Manýkıan (14,800 upaı) men ıtalııalyq Gabrıele Targetta (14,733) ıelendi. Elimizdiń taǵy bir sportshysy Zeınolla Ydyrysov tórtinshi oryndy qanaǵat tutty.
- Tennısshilerdiń álemdik reıtıngi jańartyldy. ATR tiziminde ıspanııalyq Karlos Alkaras aldyna jan salar emes. Ony ıtalııalyq Iаnnık Sınner men germanııalyq Aleksandr Zverev ókshelep keledi. Elimizdiń birinshi raketkasy Aleksandr Býblık 19-orynda tur. Aleksandr Shevchenko – 96, Beıbit Juqaev – 207, Dmıtrıı Popko – 219, Tımofeı Skatov – 235, Mıhaıl Kýkýshkın – 259-oryndarda. Áıelder arasyndaǵy úzdik úshtik – belarýstik Arına Sobolenko, polshalyq Iga Shventek, amerıkalyq Koko Gaýff. Elimizdiń betkeustary Elena Rybakına TOP-10-dyqty túıindedi. WTA reıtınginde Iýlııa Pýtınseva – 61, Zarına Dıas – 233, Jibek Qulambaeva 302-satyǵa taban tiredi.
