Foto: TSM
Erler quramasyn Astana qalasyndaǵy halyqaralyq áýejaıdan, al áıelder quramasyn Almaty qalasynnan jankúıerler, sportshylardyń ata-analary, týystary men dostary erekshe yqylaspen qarsy aldy.
Áýejaıda BAQ ókilderine suhbat bergen ulttyq quramanyń bas bapkeri Qaırat Sátjanov aldaǵy ýaqytta komanda aqpan aıynda ótetin Álem kýboginiń sheshýshi kezeńine daıyndyq júrgiziletinin aıtty. Bas bapker jarys barysyndaǵy shákirtteriniń óneri men tóreshilerdiń jumysyna qatysty pikir bildirdi.
«Birneshe sát boldy, qandaı jaǵdaı bolsa da bizdiń boksshylar qarsylastarynan bir saty joǵary óner kórsetti. Olar jeńiske jetý úshin bar kúshin saldy. Ýaqyt óte kele barlyǵy retke keledi», dedi ol.
Eki dúrkin álem chempıony Sanjar Táshkenbaı tartysty týrnırde qandaı taktıkaǵa súıengenin tarqatyp aıtty.
«Men tájirıbeli sportshymyn, halyqaralyq arenada alǵash ret óner kórsetip otyrǵan joqpyn. Bul jerde eń bastysy — bapkerlerdi tyńdaý, tek fızıkalyq emes, psıhologııalyq daıyndyq ta mańyzdy boldy. Bapkerlerdiń barlyq tapsyrmasyn oryndaýǵa tyrystym. Jalpy, bári biz josparlaǵandaı ótti», dedi chempıon.
Lıverpýldegi álem chempıonatyn altyn júldemen túıindegen Aıbek Oralbaı fınalda ózbekstandyq qarsylasymen bolǵan jekpe-jekte sheshýshi sát sońǵy raýndta bolǵanyn aıtap ótti.
«Sońǵy raýnd eń qıyn kezeń boldy. Biraq dál sol kezde ózimdi tolyq jınap, bar kúshimdi saldym. Qarsylasymnyń sharshaǵanyn kórip, basymdyq tanytý kerektigin túsindim. Sońynda bul maǵan jeńis ákeldi», dedi álem chempıony.
Aıta keteıik, atalǵan jahandyq dodada Qazaqstan quramasy keremet nátıjege qol jetkizdi. Otandastarymyz 7 altyn, 1 kúmis jáne 2 qola medal jeńip alyp, jalpykomandalyq esepte kósh bastady
