Foto: Shymkent qalalyq ákimdigi
Qazaqstan quramasy 2025 jylǵy World Boxing uıymynyń alǵashqy eresekter arasyndaǵy álem chempıonatynda keremet nátıje kórsetip, 7 altyn, 1 kúmis jáne 2 qola medal jeńip, jalpykomandalyq esepte birinshi orynǵa ıe boldy. Solardyń ishinde Shymkenttiń maqtanyshy – Sabyrhandar aǵaıyndysy da bar.
Sportshylardy qala ákiminiń orynbasary Sarsen Quranbek, dene shynyqtyrý jáne sport basqarmasy basshysynyń mindetin atqarýshy Ermek Darmenov, qalalyq boks federasııasynyń vıse-prezıdenti Qanat Oraqbaev jáne jankúıerler ystyq yqylaspen qarsy aldy.
Mahmud Sabyrhan 2023 jylǵy Tashkenttegi jeńisin qaıtalap, álem chempıonatynyń eki dúrkin jeńimpazy atandy. Al onyń 19 jasar baýyry Tórehan Sabyrhan alǵash ret álem chempıony atanyp, qazaq boks tarıhynda eń jas jeńimpaz retinde esimin jazdyrdy. Bul jetistiktiń artynda bapkeri Ilııas Oralbekovtiń eńbegi zor.
Aıta keteıik, álem chempıonatyna 68 elden 540 sportshy qatysqan. Qazaqstan quramasy erler men áıelder arasynda óz tarıhyndaǵy úzdik úshinshi nátıjeni kórsetti.
Aldaǵy ýaqytta boksshylarymyzdy álem kýbogynyń fınaldyq kezeńi, Azııa chempıonaty jáne 2026 jyly Nagoıada ótetin jazǵy Azııa oıyndary kútip tur. Sonymen qatar, Qazaqstan 2027 jyly kelesi álem chempıonatyn qabyldaýǵa daıyndyq júrgizip jatyr.
