Kúdiktige Qylmystyq kodekstiń 190-babynyń 1 bóligimen, 120-babynyń 2-bóliginiń 2-tarmaǵymen, 99-babynyń 2-bóliginiń 4,5,10 tarmaqtarymen, 188-babynyń 4-bóliginiń 3-tarmaǵymen, 200-babynyń 1-bóligimen (Alaıaqtyq, zorlaý jáne júkti áıeldi basqa qylmystardy jasyrý maqsatynda asa qatygezdikpen óltirgeni, sondaı-aq urlyq jasaǵany jáne avtokólikti zańsyz ıemdený) aıyp taǵylǵan.
«Jábirlenýshi 2022 jyly Atyraý qalasynan páter satyp alyp, santehnık mamanymen tanysqan. Kúdikti jóndeýdi talqylap, senimge kire otyryp, jábirlenýshiniń turaq ornyn satyp alý jospary týraly bilgen. Santehnık mamanynda alaıaqtyq qylmystyq quqyq buzýshylyq pıǵyly paıda bolǵan. Jábirlenýshini uıym qyzmetkerleri arqyly turaq ornyn jeńildikpen satyp alýǵa kómektesetinine sendirip, odan 400 myń teńge aldyn-ala tólem alyp, ózine ıemdengen. Keıin santehnıkke kelisim týraly birneshe ret eskertken. Bir jyldan keıin jábirlenýshi taǵy da santehnık mamanyna qońyraý shalyp, turaq orny týraly surap, másele sheshilmegen jaǵdaıda shaǵym túsiretinin aıtqan. О́ziniń júktiligi jáne odan ári kútýdiń múmkin emestigi týraly habarlaǵan. Osydan keıin santehnık aryzdy rásimdeý syltaýymen oǵan mas kúıinde kelgen. Alaıaqtyqty jasyrý úshin maska kıip, jábirlenýshini zorlap, asa qatygezdikpen óltirgen», dep habarlady atalǵan sottan.
Kúdikti budan soń páterdi tintip, seıfti ashyp, qomaqty aqsha men zergerlik buıymdardy urlap, kólik pen uıaly telefondy ıemdengen. Jalpy materıaldyq shyǵyn 13 mln teńgeden asqan.
Prokýror men jábirlenýshi tarap sottalýshyny kináli dep tanyp, oǵan ómir boıyna bas bostandyǵynan aıyrý jazayn taǵaıyndaýdy surady. Al qorǵaýshy tarap kúdiktini Qylmystyq Kodekstiń 190, 120, 200, 188-baptary boıynsha aqtaýdy, jeńil jaza taǵaıyndaýdy usyndy.
«Sottalýshynyń kinási kýálardyń, jábirlenýshilerdiń aıǵaqtarymen, saraptama qorytyndylarymen, beınejazbalarmen, oqıǵa ornyn qaraý hattamalarymen jáne zattaı dáleldemelermen rastaldy. Sot sottalýshyǵa jaza taǵaıyndaý barysynda jeńildetetin mán-jaılardy anyqtamady. Qylmystyń mas kúıinde jasalǵany aýyrlatatyn mán-jaı retinde tanyldy. Sottalýshy aıyptaýdyń barlyq epızody boıynsha kináli dep tanyldy. Oǵan ómir boıyna bas bostandyǵynan aıyrý jazasyna taǵaıyndaldy. Jábirlenýshiniń paıdasyna materıaldyq jáne moraldyq zalal óndirildi», dep málim etti sottan.
Sot úkimi zańdy kúshine engen joq.
