Is-sharaǵa Ǵylym ordasynyń bas dırektory Ular Muqajanov, mýzeı meńgerýshileri, ǵylymı qyzmetkerler, restavratorlar, sondaı-aq ál-Farabı atyndaǵy QazUÝ men Zoologııa ınstıtýtynyń ǵalymdary qatysty. Semınar Ǵylym jáne joǵary bilim mınıstrliginiń nysanaly qarjylandyrý jobasy aıasynda uıymdastyryldy. Joba jetekshisi – PhD, etnograf Aınur Beıseǵulova.
Is-shara barysynda bıologııa jáne zoologııa salasynda jıi qoldanylatyn termınderdiń qazaq tilindegi balamalary talqylanyp, Tabıǵat mýzeıi men Arheologııa mýzeıiniń qalyptasý tarıhy, sondaı-aq ǵylymı zerthana negizinde oqý-óndiristik praktıka uıymdastyrý tájirıbesi sóz boldy. Budan bólek, arheografııalyq kolleksııalardyń qalyptasý erekshelikteri, Tabıǵat mýzeıiniń jádigerleri, arheologııalyq jáne arheografııalyq qorlardy qalpyna keltirý men jańǵyrtý máseleleri qarastyryldy.
«Qazaq ǵylymynyń qara shańyraǵy sanalatyn Ǵylym ordasy búginde ǵylymı ınstıtýt retinde qalyptasyp keledi. Bul joba – mýzeılerdiń ǵylymı áleýetin arttyrýǵa, qor jınaqtaryn júıeli zerttep, jańǵyrtýǵa baǵyttalǵan mańyzdy qadam. Biz halyqaralyq deńgeıdegi ozyq tájirıbe men zamanaýı tehnologııalardy tıimdi paıdalana otyryp, mýzeı qyzmetin damytý jáne mamandardyń biliktiligin arttyrý jumystaryn jalǵastyramyz» dep atap ótti Ular Muqajanov.
Semınar aıasynda paleontologııalyq, arheologııalyq jáne arheografııalyq jınaqtardyń kórmesi men sheberlik sabaǵy uıymdastyrylyp, qatysýshylar kolleksııalardy saqtaý, qalpyna keltirý jáne ǵylymı katalog jasaý boıynsha tájirıbe almasty.
ALMATY
