Elordadaǵy Ulttyq mýzeıde «Álemniń dinı dástúrleriniń baǵa jetpes qazynalary» atty kórme ashyldy. Is-shara Álemdik jáne dástúrli dinder lıderleriniń VIII Sezi men jas dinı lıderlerdiń II forýmy aıasynda uıymdastyryldy. Kórmeniń ashylýyna sezd delegattary, jas dinı lıderler, sondaı-aq ǵylym men óner qaıratkerleri qatysyp, oılaryn ortaǵa saldy.
Alǵash sóz sóılegen Mádenıet jáne aqparat mınıstrligi Din isteri komıtetiniń tóraǵasy Ánýar Hatıev dinderdiń ortaq tusyn atap ótti.
– Adamzattyń moraldyq baǵdaryn ǵasyrlar boıy qalyptastyrǵan dinı dástúrler osy ekspozısııada qaıta tirilgendeı. Mundaǵy árbir jádiger – aıyrmashylyqtarǵa qaramastan, barlyq dinder izgilik, danalyq jáne adamsúıgishtiktiń ortaq nuryn jetkizetinin eske salady, dedi ol.
Kórmede Ulttyq mýzeı men Beıbitshilik jáne kelisim mýzeıiniń qorlarynan alynǵan qundy jádigerler qoıylypty. Atap aıtsaq, hrıstıandyq ıkonalar, aıqyshtar, ıslam dinine tán qasıetti Quran, kallıgrafııa óneriniń týyndylary, ındýızmdik qudaı músinderi, shamdar, ǵuryptyq buıymdar, býddızm dininiń duǵa monshaqtary, dybys shyǵaratyn tostaǵandar kórermenderge usynylǵan.
Is-sharada Konfessııaaralyq jáne dinaralyq dıalogtiń halyqaralyq ortalyǵy basqarma tóraǵasynyń orynbasary Baqytjan Esbergenov qysqa da nusqa jádigerlerge túsinikteme berip ótti.
– Zalda usynylǵan eksponattar – adamzattyń Qudiretke, mán-maǵynaǵa, ishki úılesimge umtylysynyń kýási. Qasıetti mátinder, ǵuryptyq buıymdar, óner týyndylary – munyń bári ár júrekke túsinikti tilde sóıleıdi, – dedi ol.
Din mamanynyń sózinshe, bul shara – jahandyq deńgeıde ózara túsinistik, úılesim men kelisimniń negizin nyǵaıtatyn rýhanı bastama bolyp otyr.
Aıta keteıik, kórme 25 qyrkúıekke deıin jalǵasady.
