Sýretti túsirgen – Erlan OMAR, «EQ»
Dástúrli baspasóz – eldi birlikke shaqyryp, ultty uıystyratyn erekshe ınstıtýt. Bul týrasynda Dıhan Qamzabekuly Memleket basshysy Qasym-Jomart Toqaevtyń «bárimiz bir ult bolyp, tabandy eńbek etýimiz kerek» degen sózin negizge alyp, ult uǵymynyń termınologııalyq máni burynǵydan keńeıe túskenin jetkizdi.
– Qazir «ult» degen sóz tek etnos maǵynasyn emes, tutas memleket uǵymyn bildiredi. Prezıdent aıtqandaı, biz osy túsinikti negizge alyp, barlyǵymyz memleket múddesi úshin qyzmet etýimiz qajet. Baspasóz tarıhyna kóz júgirtsek, gazet isi tóńkeristen keıin paıda boldy. HH ǵasyrdyń basynda ult zııalylary Reseıdiń memlekettik dýmasynda ózge halyq ókilderimen qatar týǵan eliniń máselesin batyl kóterdi. Álıhan Bókeıhan bastaǵan Alash tulǵalarymen pikirles bolǵan Tımofeı Sedelnıkov «Kazahstanskaıa pravdanyń» eń alǵashqy redaktory bolǵan. Minekı, munyń da ózindik rámizdik máni bar. Qazir de bul jaýapkershilikti abyroımen arqalap kele jatqan basylymdar memleketshildik múdde men tatýlyq taqyrybyn basty nazarǵa alyp otyr, – dedi D.Qamzabekuly.
QHA kafedralary «Shańyraq» qaýymdastyǵynyń tóraǵasy Natalıa Kalashnıkova QHA jýrnalıster klýbynyń ókilderine arnalǵan tájirıbelik kýrstyń el birligin nyǵaıtýdaǵy mańyzyn atap ótti.
– Qoǵamdaǵy tatýlyq pen ózara túsinistikti ornyqtyrýda buqaralyq aqparat quraldarynyń róli orasan zor. Ásirese dástúrli baspasóz ben Qazaqstan halqy Assambleıasynyń yntymaqtastyǵy eldi ortaq múddege uıystyratyn mańyzdy tetikke aınalyp otyr. Sol sebepti aqparat salasynyń ókilderi eldiń bereke-birligin nyǵaıtyp qana qoımaı, jańa urpaqtyń boıyna senim men azamattyq jaýapkershilikti qalyptastyrýǵa úles qosýǵa tıis, – dedi ol.
«Kazahstanskaıa pravda» gazetiniń atynan seriktestik bas dırektorynyń birinshi orynbasary Vıktor Prıanıkov ta etnosaralyq tatýlyq týrasynda pikir bildirip, ulttyń dástúri men tilin saqtap, memleketke adal eńbek etip júrgen azamattardy nasıhattaıtyn gazettiń arnaýly betin tilge tıek etti.
Al Senat depýtaty Álisher Satybaldıev jıynǵa qatysýshylarǵa óz tájirıbesin aıta kelip, jýrnalıstıkadaǵy dástúr men jańa úrdisterdi sabaqtastyrýdyń mańyzyna toqtaldy.
– Qyzmettik ótilimde jańadan bas redaktor bolyp taǵaıyndalǵannan keıin qolymdaǵy gazettiń mazmunyn ózgertip, jańa tehnologııalar men zamanaýı úrdisterdi engizý qajet boldy. Sol kezde tájirıbeli áriptesterim «Amerıka ashýdyń qajeti joq, «Egemen Qazaqstannyń» stılin úlgi qylyńdar» degen keńes berdi. Sol kúnnen bastap biz úshin «Egemen Qazaqstan» men «Kazahstanskaıa pravda» temirqazyǵymyz boldy, – dedi.
Bir shańyraq astynda tonnyń ishki baýyndaı aralasyp qyzmet etip jatqan eki redaksııanyń jemisti jetistigi týraly «Qazaq gazetteri» seriktestigi bas dırektorynyń orynbasary Qambar Ahmet jetkizdi. Etnosaralyq tatýlyqty saqtaý memlekettiktiń basty kepili ekenin nazarda ustaý barlyq BAQ ókilderiniń baǵdary ekenin aıta kelip, máseleniń baıybyna barmaı, etnos arasyn shıelenistiretin «jalt etpe» jańalyq jarııalaý jýrnalıstik etıka men kisilik ádebine jatpaıtynyn eskertti.
Al «Kazahstanskaıa pravda» gazetiniń bas redaktory Sábıt Maldybaev Assambleıa qyzmetiniń aıasynda ýaqyt qumsaǵatynda qumyǵyp qalǵan, alaıda elge erekshe qyzmet atqarǵan eleýli tulǵalardy nasıhattaý kerektigin aıtty.
«Uıǵýr avazı» gazetiniń bas redaktory Ershat Asmatov etno BAQ-tyń memleketshildik ıdeıany nasıhattaýdaǵy tájirıbesimen bólisti. Onyń aıtýynsha, etnostyq basylymdar óz oqyrmandary arasynda birlik pen yntymaq qundylyqtaryn dáriptep, qoǵamdyq kelisimdi nyǵaıtýǵa úles qosyp keledi. Jıyn sońynda qatysýshylar Assambleıa men buqaralyq aqparat quraldarynyń ózara baılanysyn nyǵaıtý, qoǵamǵa senimdi ári shynaıy aqparat jetkizýdiń mańyzdy tetikterin talqylady. Sonymen qatar redaksııa jumysymen tanysty.
