Táttini jaqsy kórmeıtin adam joq shyǵar sirá, ıá?! Ásirese, ádemi bezendirilgen torttar kózdiń jaýyn alyp, tábetti arttyrady. Dese de, olardy pisirýdiń ózi úlken eńbek pen tózimdilikti talap etedi. Osyndaı eńbektiń shynaıy baǵasyn bilip, ony óz kásibine aınaldyrǵan jandardyń biri – Indıra Baýyrjan. Ol «Baking Studio» kondıterlik ónimderiniń negizin qalaýshy, on jyldan beri tátti áleminiń qyr-syryn meńgerip kele jatqan tájirıbeli kondıter.
«Negizi men kishkentaı kezimnen tort pisirgendi jaqsy kóretinmin. Balǵyn shaqtan bastaý alǵan qyzyǵýshylyǵym meniń kásibı jolymnyń negizi boldy. 2015 jyly úıde baýyrsaq, bálish sııaqty táttilerdi pisirip bastadym. Sol kezden bastap tutynýshylarym kóbeıdi. Olar kóńilinen shyqqan saıyn bizden tort jáne basqa da tátti ónimder suraıtyn. Mine, dál sol ýaqyttan beri toqtap qalmaı ári qaraı damyp jatyrmyz», deıdi ol.
Indıranyń alǵashqy qadamy da kópshilikke etene tanys «Baldy torttan» bastalǵan eken. «Ol tortty eń alǵash Ramazan aıynda tapsyrysqa daıyndadym. Jastaıymnan tájirıbem bolǵandyqtan birden qolymnan keldi. Biraq ol ýaqytta krem daıyndaý jaǵy qıyn edi. О́ıtkeni Qazaqstanda arnaıy kilegeı, súzbeli irimshik sekildi ónimder keńinen qoljetimdi bolmaǵan. Biz dúkende bar qarapaıym ónimdermen shekteletinbiz», dep eske aldy.
Ýaqyt ótken saıyn tutynýshylardyń talǵamy kúrdelenip, erekshe tapsyrystardy oryndaýyn ótine bastaǵan. Bul rette Indıra Baýyrjan kásibı sheberligin jetildirip, bilim alýǵa den qoıǵan.
«Alǵashynda Reseıdiń kondıterlerinen onlaın sabaq aldym. Keıin elge sheteldik shef-kondıterler kelip, master-klas ótkizdi. О́zim de birneshe ret Fransııa, Anglııa, Koreıaǵa baryp, tájirıbeli mamandardyń tálimin aldym. Olardan úırengenim kásibı ósýime úlken serpin berdi», deıdi ol.
Alty jyl boıy úıde tapsyrys qabyldap, ónim daıyndaǵan Indıra Baýyrjan ýaqyt óte stýdııa ashýdy qolǵa alǵan. Solaı 2021 jyly tutynýshylar sany artqan shaqta óziniń jeke kásibin bastap, «Baking Studio»-nyń irgetasyn qalaǵan.
«Árıne, stýdııa ashý ońaı sheshim bolǵan joq. Eń basynda joldasym ekeýmiz ǵana jumys istedik. Keıin tapsyrysqa úlgermeı bastaǵan soń komanda jınaýǵa týra keldi. Qazir stýdııada segiz adam jumys isteıdi. Kondıterlik stýdııadaǵy kún tańǵy saǵat altydan bastalady. Qyzmetkerler ónimniń negizin daıyndap, vıtrınany toltyrady, tapsyrysqa arnalǵan bıskvıtterdi pisiredi. Saǵat segizde stýdııa esigin aıqara ashyp, kelýshilerge táttiler men kofe usynady», dedi ol. Búginde bul jer tek kondıterlik qana emes, kishigirim kofehanaǵa aınalǵan.
Jumystyń ońaıy joq. Qaı mamandyqty alyp qarasaq ta, onyń ózine tán ereksheligi men qıyndyǵy bar. Al bul salada da dám úılesimi men ónim sapasy birinshi orynda. Sondyqtan Indıra Baýyrjan árbir tutynýshynyń talǵamyna saı ónim usynýdy basty qaǵıdasyna aınaldyrǵan. Oǵan qosa, sheber kondıterdiń eńbegin daralaıtyn ózindik qoltańbasy bar. Avtorlyq desertteri arqyly ol tátti álemdi jańa qyrynan ashyp, kúndelikti assortımentti jańartyp otyrady. Mundaı týyndylardy daıyndaý tek tájirıbeni ǵana emes, shyǵarmashylyqty da talap etetini sózsiz.
«Bizde kúnde balǵyn ónim bolady. Kóp desertterimiz ózimizdiń avtorlyq týyndylarymyz. Ár klıenttiń talǵamyna qaraı jumys isteımiz: bireýine kremi kóp unasa, ekinshisi kerisinshe az bolǵanyn qalaıdy. Sol suranystardyń bárin eskerýge tyrysamyz. Bul ońaı sala emes. Kondıter bolý úshin eń aldymen bul jumysty shyn júrekten jaqsy kórý kerek. Qatty jaqsy kórgen saıyn damýǵa, jańa ıdeıalardy júzege asyrýǵa degen talpynys artady. Biz áli jas stýdııa bolǵanymyzben, biraz shyńdardy baǵyndyrdyq. Qıyn kezeńderden toqtamaı óttik», deıdi kásibı aspaz.
Kondıterlik ónerdiń qıyndyǵy kóp, biraq soǵan qaramastan Indıra Baýyrjan tabandylyq pen shyǵarmashylyqty qatar serik etip keledi. Ol daıyndaǵan ónimder talaı júrekke jol taýyp, talaı qýanyshty sáttiń sebepkerine aınaldy. Eńbek pen sheberliktiń tátti toǵysy dál osy jerde tutastyq tapqan.
