ASTANA. 20 naýryz. Búgin Qazaqstan Respýblıkasy, Belarýs Respýblıkasy jáne Reseı Federasııasy Prezıdentteri kezdesýiniń qorytyndysyna arnalǵan birlesken brıfıng berdi. Bul týraly Aqorda baspasóz qyzmetiniń deregine súıengen egemen.kz tilshisi habarlady.
Qazaqstan Prezıdenti úsh el ekonomıkasynyń bıylǵy damýy budan arǵy yqpaldastyqtyń máselelerin egjeı-tegjeıli qarastyrýdy jáne týyndaıtyn máselelerdi sheshýdi qajet etetinin atap ótti.
«Ekonomıkalarymyzdaǵy daǵdarys qubylystaryn eńserý jónindegi is-qımyldardyń birlesken josparyn ázirleý mańyzdy. Búgingi kezdesý naq osy taqyrypqa arnaldy. Biz saýda-ekonomıkalyq jáne ınvestısııalyq yntymaqtastyqty damytýǵa ýaǵdalastyq. Úkimetterimizge ózara saýda ósimin qaıta jańǵyrtý jóninde sharalar qabyldaýdy tapsyrdyq», – dedi Qazaqstan basshysy.
Nursultan Nazarbaev Ýkraınanyń ońtústik-shyǵysyndaǵy qaqtyǵysty retteý máselesi de talqylanǵanyn aıtty.
«Bul másele jóninde memleketterimizdiń árqaısysynyń ustanymy belgili. Biz máselege naqty qaraımyz. Ýkraınada qalyptasqan ahýaldan dıplomatııalyq jolmen shyǵý qajet, bul másele áskerı jolmen sheshimin tappaıdy. Osy oraıda, qabyldanatyn kez-kelgen sheshim irgeli halyqaralyq quqyq qaǵıdattaryna negizdelgeni mańyzdy. Biz Ýkraınanyń turaqty, táýelsiz jáne aýmaǵy birtutas memleket bolyp qalýyna múddelimiz. Qazaqstan Mınsk kelisimderin jáne qol jetken ýaǵdalastyqtardy barlyq taraptyń oryndaýyn qoldaıdy», – dedi Qazaqstan Prezıdenti.
Reseı Prezıdenti memleketter basshylary ózara qarym-qatynastardyń keshendi máselelerin talqylaǵanyn aıtty.
«Bizdiń elderimizdi saýda jáne ınvestısııalyq tyǵyz baılanystar biriktiredi. «Úshtiktiń» ishki jalpy ónimniń jıyntyq kólemi TMD-nyń jalpy óniminiń 85 paıyzyn quraıdy. Biz orasan óndiristik jáne ǵylymı áleýeti bar iri naryq qalyptastyrýdamyz. Reseı Qazaqstan men Belarýstiń syrtqy saýdasynda birinshi oryn alady. О́tken jyl qorytyndysyn boıynsha Reseıdiń osy eki elmen taýar aınalymy 60 mıllıard dollardy qurady. Al Belarýs pen Qazaqstan Reseı Federasııasynyń saýda teńgeriminde úshinshi oryndy ıelenip otyr», – dedi V.Pýtın.
Reseı Prezıdenti úsh eldiń ónerkásiptik-tehnologııalyq kooperasııa, mashına jasaý, ǵarysh jáne energetıka salalaryndaǵy baılanystary nyǵaıyp kele jatqanyna nazar aýdardy.
V.Pýtınniń málim etkenindeı, kelissózder barysynda Ýkraınadaǵy ahýal jóninde de áńgime boldy.
«Qazaqstan men Belarýs prezıdentteriniń bul problemany retteýge belsene qatysqanyn atap aıtqym keledi. Mınskide qol jetken kelisimniń arqasynda qarýly qaqtyǵysty ýshyqtyrmaýdyń múmkindigi týdy», – dedi Reseı Prezıdenti.
A.Lýkashenko kezdesý barysynda úsh eldiń ózara yqpaldastyq baǵyty, sondaı-aq ornyqty ári ózara tıimdi yntymaqtastyqty nyǵaıtý maqsatynda saýda, aqsha-nesıe jáne basqa salalarda qabyldanýy qajet sharalar talqylanǵanyn aıtty.
«Budan arǵy is-qımyldardyń barlyq baǵyttary boıynsha ustanymdardyń sáıkes kelýi bizdiń kezdesýimizdiń qorytyndysy boldy. Biz saýda-ekonomıkalyq yntymaqtastyqty álemdik konıýnktýranyń jańa jaǵdaılary men elderimizdiń ekonomıkalaryndaǵy qazirgi ahýaldy eskere otyryp damytý úshin qosymsha sharttar qalyptastyrý jóninde naqty qadamdardy belgiledik», – dedi Belarýs Prezıdenti.
Sáken Maılybaı.
