Foto: stat.gov.kz
Sharýalarǵa 22 suraq qoıylyp, mal men qustyń bolýy, jer resýrstaryn paıdalaný, baqsha egý, tyńaıtqysh qoldaný jáne basqa da málimetter suralady.
Intervıýerler aıryqsha kók tústi formada – jılet pen beısbolkada bolady, beıdjde onyń jeke basyn rastaýǵa arnalǵan QR-kod ornalasady.
«Biz sanaqtyń onlaın kezeńin aıaqtadyq, ol kezde aýyl sharýashylyǵy qurylymdary men úı sharýashylyqtarynyń saýalnamany sanaq.gov.kz saıtynda toltyrý múmkindigi boldy. Ol kezeńge 600 myńnan astam respondent qatysty. Endi aýqymdy kezeń bastaldy: ıntervıýerler úılerdi aralap, derekterdi planshet arqyly jınaıdy. Barshańyzdy sharaǵa belsendi qatysýǵa jáne ózekti aqparat berýge shaqyramyz. Suraqtar qarapaıym ári tek aýyl sharýashylyǵy qyzmetine qatysty bolady. Barlyq jaýap statıstıkalyq maqsatta paıdalanylady jáne úshinshi tulǵalarǵa berilmeıdi», dedi Ulttyq statıstıka bıýrosynyń basshysy Maqsat Turlybaev.
Bıýro aqparattyń qaýipsizdigi men qupııa saqtalýyna kepildik berip, jaýap zańmen qorǵalatynyn, al derekter tek jalpylanǵan túrde qoldanylatynyn málimdedi. Sanaqqa qatysty suraqtar týyndaǵan jaǵdaıda Bıýronyń baılanys ortalyǵyna 1446 nómiri arqyly habarlasýǵa bolady (jumys ýaqyty 9.00–21.00, qońyraý shalý – tegin).
Aıta keteıik, 1 tamyzda bastalǵan Aýyl sharýashylyǵy sanaǵy, 20 qazanǵa deıin jalǵasady. Jınalǵan derekter salaǵa qatysty málimetterdi jańartýǵa jáne aýyl sharýashylyǵyn damytýǵa arnalǵan sheshimder qabyldaýǵa negiz bolady.
