Horvatııa astanasy Zagrebte ótip jatqan grek-rım kúresinen álem chempıonatynda Qazaqstan qorjynyna altyn medal tústi.
Otandasymyz Aıdos Sultanǵalı 60 kg deıingi salmaqtyń fınalynda Álisher Ganıevten (О́zbekstan) basym tústi.
Týrızm jáne sport mınıstrligi málimetinshe, Aıdos Qazaqstanǵa 26 jyldan keıin eresekter arasyndaǵy álem chempıonatynyń altynyn saılady.
Osyǵan deıin grek-rım kúresinen Afınyda 1999 jyly otandasymyz Mhıtar Manýkıan (63 kg) top jarǵan. Osy aralyqta Almat Kebispaev, Meırambek Aınaǵulov, Demeý Jadyraev, Qorlan Jaqansha, Erjet Jarlyqasyn syndy bozkilem sheberleri bas júldege bir taban jaqyn boldy.
Jalpy alǵanda Sultanǵalı – egemendik alǵannan beri kúrestiń osy túrinen eresekter arasyndaǵy álem chempıonatynyń fınalynda kúresken onynshy qazaq palýany.
Grek-rım kúresi elimizde buqaralyq sıpat alǵan tanymal sport túriniń qataryna kiredi. Búginde bul jetistiktiń bári memleket tarapynan kúreske basymdyq berilip, barlyq jaǵdaı jasalyp jatqannyń arqasynda.
29 jastaǵy qyzylordalyq sportshy osyǵan deıin 60 kg deıingi salmaqta álem chempıonatynda 2 ret qola medal ıelengen. Sultanǵalı keshe Horvatııadaǵy básekeniń irikteýinde Maksvell Hopper Blekti (AQSh), Melkamý Feteneni (Izraıl), shırek fınalda Parıj Olımpıadasynyń qola júldegeri, Azııa oıyndarynyń qola júldegeri Seýn Lıdi (Soltústik Koreıa) jyqty. Jartylaı fınalda Amıran Chavadzeden (Grýzııa) myqty ekenin dáleldedi.
