Foto: pixabay
Bul jer tegin tańdap alynǵan joq. Sebebi munda qalanyń qoqys polıgony ornalasqan. Qolqany qapqan kúlimsi ıis, aınala shashylǵan sellofan paketter, eski-qusqy turmystyq zattar, taý bop úıilgen qoqys qorqynyshty kórinedi. Betperde taǵyp, qolǵap kıgen belsendi jastar irkilmeı iske kirisip ketti. Qaladaǵy memlekettik mekemelerdiń, kásiporyndar men qoǵamdyq uıymdardyń ókilderi ekovolonterlermen tize qosyp, jıyny 300-den asa qatysýshy qoqys polıgonynan О́skemen – Altaı trassasyna deıingi aralyqty súzip shyqty. Tirkeme ilgen traktorlar birinen keıin biri kelip, qapqa salynǵan qoqysty tıep alyp ketip jatty.
– Bul kúni búkil álemde mıllıondaǵan adam senbilikke shyǵyp, tabıǵatty qorǵaýǵa atsalysady. Bastamaǵa úles qosyp, eriktiler, stýdentter, jumysshy jastar ortaq iske jumyldyryldy. Aıta keterligi, jastardyń deni óz erkimen kelip qatysty. Bul, álbette, qoǵamnyń ekologııalyq mádenıetiniń artyp kele jatqanyn kórsetedi, – dedi oblystyq ekologııa departamentiniń baspasóz hatshysy Arýjan Musahanova.
Glýbokoe aýdanynyń «Malo-Ýba» orman sharýashylyǵy aýmaǵynda ótken ekoaksııa aıasynda tabıǵat janashyrlary 113 myń túp Sibir shyrshasy kóshetin ekti.
Jalpy, oblystaǵy tazalyq kúnine shamamen bir myńnan astam adam qatysty. Olardyń ishinde memlekettik organdar men kásiporyndardyń qyzmetkerleri, oqýshylar, stýdentter, úkimettik emes uıymdardyń ókilderi, eriktiler, belsendi qala turǵyndary bar.
Ekologııa jáne tabıǵı resýrstar mınıstrligi shara qorytyndysyn Qazaqstan rekordtar kitabyna engizýge ótinim berdi. Dúnıejúzilik tazalyq kúni jyl saıyn 190-nan astam eldi biriktiredi, elimiz de bul bastamany dástúrli túrde, belsendi qoldap keledi.
Shyǵys Qazaqstan oblysy
