Qaryz alyp... qashyp júr

«Qaryz kúlip baryp, jylap qaıtady» deıdi halyq danalyǵy. Sońǵy kezderi bank­terden nesıe alyp, mezgilinde qaıtar­maıtyndardyń «Alaǵan qolym, beregen» degendi qaperden shyǵaryp alýy jıi kezdesýde. Sondyqtan jolaýshylar avtobýstaryndaǵy monıtor­lardan bankterge qaryzy bar aqtóbelik­terdiń fotosýretteri kórsetile bastady. Arala­rynda ul-qyzdaryna alıment tóleý­den bas saýǵalap júrgen qashaq ákeler de bar. Oblystyq ádilet departamenti baspasóz qyzmetiniń mamany Alısa Ama­novanyń habarlaýynsha, qala aýma­ǵynda jolaýshy tasymaldaıtyn avtobýs­tarda boryshkerlerdiń aty-jóni ǵana emes, fotosýretterin de kórsetýge barýdaǵy maqsat – olardyń uıatyn oıatý bolmaq. Boryshkerlerdiń jalpy sany 15 adam. Olardyń barlyǵy bankterden nesıe alyp, óteýden jaltaryp júrgen kórinedi. Boryshkerler esh jerde jumys istemeıdi jáne nesıe rásimdegen kezdegi meken-jaılarynan qonys aýdarǵan, qazir turatyn meken-jaılary belgisiz. Sondyqtan, sot oryndaýshylary qolda­rynda bar aqparatty avtobýstarda taratyp, boryshkerlerdi osylaı uıaltýdy sheshken. Bankke qaryz aqtóbelikterdiń kóshin Aqtamaq Kóptileýova esimdi azamatsha bastap tur. Onyń bank aldyndaǵy qaryzy 1 mıllıon teńgeden asqan. Qazir oblysta el aýmaǵynan shyǵýǵa ýaqytsha shekteý qoıylǵan 12 394 boryshkerdiń jalpy qaryzy 30 660 286 699 teńgeni quraıdy eken. Satybaldy SÁÝIRBAI, «Egemen Qazaqstan». Aqtóbe oblysy.