– Úı alǵysy kelgen adamǵa eń úlken kómek – ýaqytynda ashylǵan depozıt. Depozıt toltyrýdy erterek bastaǵan saıyn, ıpoteka rásimdegende tólenetin artyq shyǵyn azaıa beredi. Mysaly, eki azamatty qarastyraıyq. Aıbek depozıtin 36 aı buryn ashyp qoıǵan, al Sáken nebári 7 aı buryn ǵana ashqan. Ekeýi de 20 mln teńgelik úı alǵysy keledi. Ekeýinde de 10 mln teńge jınaq bar, qalǵanyn ıpotekamen jabamyz degen nıette.
Bir qaraǵanda jaǵdaı birdeı kórinedi. Biraq Aıbek 36 aı buryn depozıt ashyp qoıǵandyqtan, 14 aıdan keıin-aq bankke baryp, ótinish jazyp, 8,5%-dan 5%-ǵa óte alady. Osylaısha, onyń alǵashqy kezeńdegi artyq tólemi bar bolǵany 1 983 324 teńge bolady. Al Sákenniń jaǵdaıy basqasha. Ol depozıtti kesh ashqandyqtan, 14 aıdan keıin tómen paıyzǵa óte almaıdy. Keminde 29 aı kútýge májbúr. Sol ýaqyt ishinde ol joǵary paıyzben tóleı beredi. Sonyń saldarynan onyń artyq tólemi 4 108 314 teńgege jetedi.
Bul qarapaıym mysal depozıt merziminiń qanshalyqty mańyzdy ekenin kórsetedi. Depozıtti erterek ashyp qoıǵan adamnyń úı alar kezde birneshe mıllıon teńgege deıin únemdeýge múmkindigi bar.
Sondyqtan qazirden bastap depozıt ashyp qoıǵan jón. Aqsha birden úı alýǵa jetpese de, ýaqyty kelgende úlken kómegin tıgizedi. Bul – árkimniń qolynan keletin qadam. Josparly túrde júzege asyrsańyz, erteńgi kúni artyq shyǵynnan qutylyp, «Otbasy banktiń» júıesi arqyly tómen paıyzben baspanaǵa qol jetkize alasyz.
