«Almaty» áleýmettik-kásipkerlik korporasııasy habarlap otyrǵandaı, boks-parkte jańa formattaǵy dúkender, kafe, sport stýdııalary, keńse men demalys oryndary toǵystyrylǵan. Keshen Tóle bı kóshesi men Rozybakıev kóshesiniń qıylysynda ornalasqan, jalpy aýmaǵy – 2,7 myń sharshy metr. Munda jasyl alleıalar, balalar alańdary jáne mádenı is-sharalarǵa arnalǵan ashyq aspan astyndaǵy amfıteatr bar.
Alǵashqy boks-parkte 17 saýda-keńse modýli qarastyrylǵan. Joba qalanyń iskerlik ınfraqurylymyn damytý baǵdarlamasynyń bir bóligi. Sarapshylardyń aıtýynsha, bul format ekologııalyq tıimdiligimen, qurylys qarqynynyń jedeldigimen jáne keńistikti uıymdastyrýdyń zamanaýı tásilimen erekshelenedi.
Jobany «Aq-Orda» JShS kompanııasy júzege asyryp otyr. Qarjylandyrýdy «Almaty Finance» JShS – «Almaty» ÁKK-niń enshiles uıymy qoldady. «Almaty Business – 2025» baǵdarlamasy aıasynda 500 mln teńge bólinip, 6% jyldyq mólsherlememen 7 jylǵa nesıe berildi. Jyl saıyn keshen qala bıýdjetine shamamen 30 mln teńge salyq túsimin ákeledi.
«El men qala úshin tyń formattaǵy promenad turǵyndardy tarta túsetin jańa ortalyqqa aınalady. Ol yńǵaıly qalalyq orta men zamanaýı sáýletti, bızneske qolaıly jaǵdaılardy ushtastyrady. Sonymen birge, joba aıasynda qala bıýdjetine jyl saıyn shamamen 30 mln teńge salyq túsedi», – dedi «Almaty Finance» JShS basqarma tóraǵasy Berik Qusaıynov.
