Depýtat óz saýalynda Memleket basshysy Qasym-Jomart Toqaevtyń bilim salasyna aıryqsha mán berip otyrǵanyn atap ótti. Ol 2019 jyldan bastap atqarylǵan jumystardy eske saldy: bilim salasynyń bıýdjeti úsh ese artqanyn, 1 mıllıonnan astam oqýshyǵa arnalǵan 1200 mektep ashylǵanyn, «Keleshek mektepteri» ulttyq jobasy aıasynda 217 jańa mekteptiń salynatynyn, onyń 128-i paıdalanýǵa berilgenin, Bilim berý ınfraqurylymyn qoldaý qory esebinen 60-tan astam mektep ashylǵanyn aıtty.
Sonymen birge, «Pedagog mártebesi týraly» zań qabyldanyp, «Qazaqstannyń eńbek sińirgen ustazy» ataǵy engizilgenin, búginde 74 muǵalim osy qurmetke ıe bolǵanyn, eki ustazdyń «Qazaqstannyń Eńbek Eri» atanǵanyn jetkizdi.
Sonymen qatar, Qaırat Balabıev bilim sapasyn jetildirý úshin Úkimetke mynadaı usynystaryn bildirdi:
-
Bastaýysh synyptarda «Álippe», «Ana tili» men matematıka pánderin negizgi retinde qaldyryp, damytý. Balanyń oqý saýattylyǵy 1-synyptan bastap «Álippemen» árip úırený, býynǵa qosyp oqý arqyly qalyptasýy tıis.
-
Joǵary synyptarda kásibı baǵdar negizinde qazaq tili, qazaq ádebıeti, matematıka, jaratylystaný, tarıh, quqyq, shet tilderi sııaqty pánderdi tereńdetip oqytý. BJB men TJB sııaqty formaldy baǵalaý júıelerin alyp tastap, baǵalaýdy qundylyqqa jáne jeke damý progresine negizdeý.
-
Balabaqshadan bastap mektepke deıingi baǵdarlamada eńbekke baýlý, shyǵarmashylyqqa úıretý jáne tulǵalyq damýǵa baǵyttalǵan biryńǵaı ádistemeni engizý. Biryńǵaı mektep formasyn bekitý arqyly ata-analardyń artyq shyǵynǵa ushyramaýyn qamtamasyz etý. «Áleýmettik ámııan» júıesin tıimdi iske qosyp, muqtaj otbasylarǵa avtomatty qoldaý tetikterin engizý.
-
Muǵalimderdi artyq esep berýden bosatyp, tek oqytý men tárbıege kóńil bólýine jaǵdaı jasaý.
-
Muǵalimderdiń biliktiligin arttyrý kýrstaryn tájirıbege negizdelgen jáne naqty quraldarmen jabdyqtalǵan júıege kóshirý.
Depýtat bul sharalar bilim berý sapasyn arttyrýǵa, ustazdardyń kásibı áleýetin kúsheıtýge, áleýmettik ádilettilikti qamtamasyz etýge yqpal etetinin aıtty.
