Memleket basshysynyń tapsyrmasymen qolǵa alynǵan «AI-Sana» baǵdarlamasy – elimizdiń bilim, ǵylym jáne ınnovasııa salasyndaǵy eń iri qadamdarynyń biri. «AI-Sana» – stýdentter arasynda jasandy ıntellekt salasyndaǵy daǵdylardy jan-jaqty damytýǵa baǵyttalǵan biregeı baǵdarlama. Ol 100 myń qatysýshyny qamtıdy jáne el ekonomıkasynyń áleýetin kóterýge, tehnologııalyq kásipkerlikti qoldaýǵa basymdyq beredi. Ásirese «DeepTech»-startaptardy damytýǵa erekshe nazar aýdarylǵan, sebebi olar elimizdiń tehnologııalyq jáne ekonomıkalyq ósiminiń negizgi qozǵaýshy kúshi bola alady.
Baǵdarlama halyqaralyq sarapshylardyń qatysýymen ázirlengen. Onyń qalyptasýyna negizgi úles qosqan – Stenford ýnıversıtetiniń Joǵary bilim mektebiniń bas tehnologııalyq dırektory ári qaýymdastyrylǵan dekany Pol Kım. Sondaı-aq baǵdarlamany ázirleýde «Stanford University», «Imperial College London», «King’s College London», «Royal Academy of Engineering», sondaı-aq «SETsquared», «UKSPA» sııaqty ınnovasııalyq platformalardyń tájirıbesi paıdalanylǵan. Bul seriktester aldyńǵy qatarly bilim men úzdik tájirıbelerge jol ashyp, baǵdarlamanyń jahandyq tájirıbeni jergilikti qajettiliktermen ushtastyrýyna múmkindik beredi. «AI-Sana» óz betinshe bilim alý, zertteý jáne qoldanbaly baǵyttardy biriktiretin tásildi qamtıdy. Onyń negizgi maqsattary:
- Jasandy ıntellekt boıynsha irgeli bilim men daǵdylardy qalyptastyrý.
- Ekonomıkanyń basty salalaryna qajet kásibı mamandar daıarlaý.
- JOO men ǵylymı zertteý ınstıtýttary negizinde «DeepTech»-startaptar generasııasyn qoldaıtyn turaqty ekojúıe qurý.
«AI-Sana» elimizdi «startap-ult» ıdeologııasyna jeteleıtin negizgi qozǵaýshy kúshterdiń biri bolmaq. Ol adam kapıtalyn damytýǵa, joǵary tehnologııalyq sheshimderdi engizýge jáne tehnologııalyq kásipkerlikti qoldaýǵa yqpal etip, bolashaqtyń ǵylymǵa negizdelgen ekonomıkasyn qalyptastyrýǵa arnalǵan platformalyq ekojúıe jasaıdy.
Mamandardyń aıtýynsha, bul bastama elimizdegi dástúrli bilim júıesin ózgertip, ǵylymı zertteý baǵytyndaǵy ýnıversıtetterdi qalyptastyrýǵa múmkindik beredi. Ýnıversıtetterdiń halyqaralyq tájirıbege súıene otyryp jańa formatqa kóshýi eldiń zııatkerlik áleýetin kóterip qana qoımaı, álemdik tehnologııalyq jarysta alǵa shyǵýyna jaǵdaı jasaıdy.
Ǵylym jáne joǵary bilim mınıstri Saıasat Nurbektiń sózinshe, jańa tehnologııalardy ıgerý bolashaq mamandar úshin ǵana emes, eldiń ekonomıkalyq qýaty men básekege qabilettiligi úshin ǵana de strategııalyq mańyzǵa ıe. Ýnıversıtetterdegi ózgerister men stýdentterdiń bastamalary qazirdiń ózinde aıtarlyqtaı nátıje bere bastady.
«Baǵdarlama júzege asyp jatqan 5 aıda bizdiń stýdentter 119 jasandy ıntellekt agentin qurdy, taǵy 395-i ázirlenip jatyr. Nátıjesinde, 20 ýnıversıtette JI, mashınalyq oqytý jáne kıberqaýipsizdik salasynda 25 jańa bilim baǵdarlamasy ashyldy», deıdi mınıstr.
«Satbayev University» – «AI-Sana» baǵdarlamasyn joǵary bilim júıesine engizetin 27 tirek ýnıversıtettiń biri. Ýnıversıtet «Huawei ICT Academy» kýrstaryn jáne óziniń avtorlyq baǵdarlamalaryn qazaq jáne aǵylshyn tilderinde usynyp otyr. «Satbayev University» tarapynan ázirlengen «Barshaǵa arnalǵan jasandy ıntellekt» kýrsyn qazirge deıin 12 myńnan astam adam, sonyń ishinde 654 oqytýshy aıaqtap úlgergen. Oqý mazmuny ınjenerlik jáne qoldanbaly mindetterde JI-di qoldanýǵa baǵyttalǵan.
Sátbaev ýnıversıtetiniń akademııalyq máseleler jónindegi prorektory Raısa О́skenbaevanyń aıtýynsha, oqý ornynda jasandy ıntellekt salasyndaǵy bastamalar óte kóp. Ol ýnıversıtettiń oqý baǵdarlamalaryn jańartyp, zamanaýı JI-tehnologııalaryn bilim úderisine engizip jatqanyn atap ótti. Sonymen qatar ındýstrııalyq seriktestermen yntymaqtastyq damyp, túlekterdiń kásibı daıyndyǵy jańa deńgeıge kóterilip jatqanyn jetkizdi.
«Búginde jasandy ıntellekt – tehnologııa ǵana emes, bilim men ǵylymdy jańa deńgeıge kóteretin qýatty qural. «Satbayev University» osy baǵytty basymdyqqa alyp otyr. Ýnıversıtetimizdiń oqý baǵdarlamalary jańartylyp jatyr. Biz teorııalyq bilim berip qana qoımaı, stýdentterge naqty jobalarda jumys isteý múmkindigin usynamyz. JI-tehnologııalaryn bilim úderisine engizý – bolashaq ınjenerler men ǵalymdardyń kásibı daıyndyǵyn jańa sapaǵa shyǵarady. Mysaly, stýdentterimiz «Big Data» taldaý, mashınalyq oqytý, neırondyq jeliler qurý, robottehnıka sııaqty salalarda tájirıbe jınap jatyr. Bul – erteńgi kúni eńbek naryǵynda suranysqa ıe bolatyn mamandyqtar», deıdi R.О́skenbaeva.
«Ǵylym qory» AQ basqarma tóraǵasy Kámil Aqatovtyń aıtýynsha, elimiz bilim, ǵylym salasyna jasandy ıntellektini engizýge tolyq daıyn.
«AI-Sana» baǵdarlamasy – elimiz úshin strategııalyq mańyzy bar qadam. Búginde jasandy ıntellektini engizýge tolyq daıynbyz. Ǵylym qory ınnovasııalardy qoldaýdyń jańa tásilderin engizip, elde JI-ekojúıeniń qalyptasýyna serpin berýdi kózdep otyr. Bizdiń maqsat – jekelegen ǵylymı jobalardy qarjylandyrý ǵana emes, tehnologııalyq damýdy jedeldetetin júıeli sheshimder qabyldaý», deıdi ol.
