Sýretti túsirgen – Jangeldi ÁBDIǴALYM
«Shubarkól kómiriniń» ortasha quny (tonnasyna) – 19 100 teńge, «Kýznesk» kómiri – 16 500 teńge, al «Maıkúbiniki» – 16 000 teńge shamasynda. «Shubarkól kómiri» Qaraǵandynyń óz basynda 15 500-15 800 teńge aralyǵynda saýdaǵa túsip jatyr. Degenmen baǵa turaqsyzdyǵy da baıqalady. Qala mańyndaǵy eldi mekenderge kómir arzan baǵaǵa jetkizilse, qashyq aýyldarǵa sál qymbatqa tasymaldanady. Bylaısha aıtqanda, kómirdiń baǵasyna otynnyń sapasynan góri joldyń alystyǵy áser etip otyr. Baǵanyń qubylýyna tasymaldaý núkteleriniń qashyqtyǵy da áser etedi. Mysaly, Nura, Aqtoǵaı aýdandaryna vagon-vagon kómir tasıtyn temirjol tuıyǵy joq.
О́ńir turǵyndaryna sapaly kómir jetkizip otyrǵan negizgi qoımanyń biri – Prıshahtınskidegi «PSV86» JShS aılaǵy. Munda jyl boıy «Shubarkól kómiri» saýdalanady. Bul otynnyń basqa otyndardan aıyrmashylyǵy – qyzýy qatty ári kúli az. Qoımada qazirdiń ózinde shamamen 5 myń tonna kómir bar. Buǵan qosa, táýligine taǵy 500 tonnaǵa jýyq jetkiziledi.
– Bizdiń qoıma jyl on eki aı jumys isteıdi. Jaz mezgilinde de kómirge suranys joǵary. Monsha jaǵyp, tabys tabatyndardyń barlyǵy bizdiń kómirdi tutynady. Qyzý jumys endi bastaldy. Qysqa qamdanǵan halyqtyń qarasy qalyń. Qor jetkilikti. Kúnine kómir tıelgen 100-150 júk kóligin jóneltemiz, – deıdi qoıma basshysy Nıkıta Anosov.
Munda atalǵan kómir 15 800 teńgeden saýdalanady. Byltyrǵy baǵadan sál joǵary. Qoıma basshylyǵy sebebin temirjol tasymaly tarıfteriniń ósýinen dep túsindiredi. Áıtse de, belgilengen shekti somadan asqan joq. О́ńir atyrabyndaǵy kómir óndirýdiń ózindik ereksheligi bar kásiporyndardyń biri – «Rapıd» JShS. Munda qara altyn ashyq ádispen emes, jerasty tásilimen alynady. Sol sebepti, mundaǵy kómirdiń baǵasy da basqalarǵa qaraǵanda edáýir joǵary.
– Bizdiń kompanııa Úkimetpen 2001 jyldan beri kelisimshart negizinde jumys istep keledi. Buryn jabylǵan shahtalardyń ornynda qaıta qurylyp, qazir jańa tehnologııalardy paıdalanyp, jerasty ádisimen kómir óndiremiz. Kóbine bizdiń ónimdi «Aqtaý» sement zaýyty tutynady. Sapa baǵaǵa saı, – deıdi kásiporyn basshysy Andreı Belov.
Qysqasy, qysqy otynnyń qory jetkilikti mólsherde. Tek, alypsatarlar baǵany sharyqtatpasa ıgi. Deldal qaltany qaǵyp, aýyldy qaltyratpasa, qoımalardaǵy qara altyn aldaǵy qysqa jetip-artylǵaly tur.
Qaraǵandy oblysy
