Mektep qabyrǵasynan Damır dzıýdomen shuǵyldanyp, biraz belesterdi baǵyndyrdy. 20 jasqa tolǵan shaǵynda djıý-djıtsýǵa myqtap den qoıdy. Jekpe-jektiń dál osy túrinde jas jigittiń juldyzy jarqyraı jandy. Bilikti bapker Rýstam Balabaevtiń qol astynda jattyqan ol 2017-2024 jyldar aralyǵynda orasan zor tabystarǵa qol jetkizdi. Atap aıtsaq, AJP men ACBJJ lıgalarynda saıysqa túsip, álemniń birneshe dúrkin chempıony atandy. UWW, JJIF, ACBJJ uıymdastyrǵan dúnıejúzilik dodalarda júldegerler sanatynan kórindi. AQSh-ta ótken IBJJF men NAGA týrnırlerinde top jardy. San márte Qazaqstan chempıonatynda qarsylas shaq keltirmedi. Osyndaı zor tabystarynyń arqasynda Sadyrov qara belbeý ıegeri atandy.
Kásibı sportshy retinde óz karerasyn aıaqtaǵannan keıin áıgili sportshy birden tóreshilik kásipti tańdady. Túrli sanaqtan múdirmeı ótken ol JJIF, JJAU, AIGA, IBJJF, AJP jáne ADCC sertıfıkattaryn ıelendi. Qazirgi kezde Damır asa iri halyqaralyq dodalardan jıi kórýge bolady. Qazaq mamany Mońǵolııa, Túrkııa, BAÁ, Brazılııa jáne bizdiń elde ótken álem chempıonattarynda qazylyq etti. О́ziniń tereń bilimi, kásibı biliktiligi jáne qara qyldy qaq jarǵan ádildigimen kózge túsken Sadyrov kúni keshe ǵana AQSh-tyń Las-Vegasta qalasynda aıaqtalǵan IBJJF World Masters týrnırine qazylyq etý múmkindigine ıe boldy. Sóıtip, onyń esimi djıý-djıtsý álemindegi bedeli eń zor, mártebesi eń bıik jarysta tóreshilik qyzmet atqarǵan Qazaqstannyń tuńǵysh ókili retinde sporttyq shejirege jazyldy.
Bapker retinde de Damır Sadyrov óziniń myqtylyǵyn moıyndatty. Ol dúnıejúzilik deńgeıdegi dodalarda daralanǵan birneshe jekpe-jek sheberlerin daıyndady. Solardyń arasynan Rınat Gorbachıov pen Marıan Ordabaeva syndy saqa sportshylardy bóle-jara atap ótýge bolady. Olardyń ekeýi de álem chempıonattarynyń júldegerleri.
Keıipkerimizdiń taǵy bir qasıeti – Sadyrov djıý-djıtsý fılosofııasyn jetik meńgergen. Qandasymyzdyń ózi oılap-tapqan ádis-tásilderi de bar. Alǵashynda bilikti bapker ony tól shákirtterine úıretti. Olar ony túrli jarystarda keńinen qoldanyp, jaqsy nátıje shyǵardy. Qazirgi kezde Damırdiń bul ádisterin basqa da memleketterdiń sheberleri tıimdi paıdalanyp, óz kádelerine jaratýda.
