Tanystyrylymǵa QR Prezıdentiniń keńesshisi Ásel Janasova, dúldúl daryn Dımash Qudaıbergen, Týrızm jáne sport vıse-mınıstri Baýyrjan Rapıkov, «Kazakh Tourism» UK» AQ basqarma tóraǵasynyń mindetin atqarýshy Danıel Serjanuly, «Qazaqstan» RTRK» AQ basqarma tóraǵasy Ernur Býrahan, Hunan TV arnasynyń «Kókjıek daýysy» jobasynyń atqarýshy prodıýseri Van Chın jáne jobanyń prodıýseri ári bas rejısseri Lýo Sınsın qatysty.
Aýqymdy jobanyń túsirilimi elimizdiń 6 óńiri Túrkistan, Mańǵystaý, Almaty jáne Aqmola oblystary, sondaı-aq Almaty men Astana qalalaryn qamtyǵan. «Voice Beyond Horizon-nyń» túsirilim barysynda 150 maman ter tókken. Án dodasynda Qazaqstan, Qytaı, Qyrǵyzstan, Italııa, Malaızııa jáne Serbııa ónerpazdary baq synaıdy. Oryndaýshylar shyǵarmashylyq sapardy júrdek poıyzben jasap, elimizdiń týrıstik oryndarymen keńinen tanysqan. Endi «Voice Beyond Horizon» jobasynyń negizgi lokasııalary boıynsha týrıstik marshrýt qurý josparlanyp otyr.
Uly Jibek jolynyń boıyndaǵy Túrkistannan bastalǵan joba, Kaspıı teńizi jaǵasy men tabıǵattyń tylsym syryn saqtaǵan Bozjyrada jalǵasyn taýyp, Almaty óńiriniń injý-marjandaryn - Qaıyńdy kólin, Dúnıejúzilik UNWTO týrıstik uıymy álemdegi úzdik týrıstik aýyldardyń biri dep tanyǵan Saty aýylyn, Qapshaǵaı sý qoımasyn, Aqmola oblysyndaǵy Kóbeıtuz kóli men Shýchınsk-Býrabaı kýrorttyq aımaǵyn pash etti. Fınaldyq kezeń elordada uıymdastyrylǵan.
«Osy joba aıasynda kóptegen qundy dúnıeler mádenıet jáne týrızmdi damytý turǵysynan atqaryldy dep oılaımyn. Baıqaýda qatysýshylardyń vokaldyq múmkindikterine ǵana den qoıylmaı, elimizdiń kórnekti jerlerin kórsettik. Týrızm damysa, ekonomıkamyzǵa úlken septigin tıgizedi degen nıet», Dımash Kudaıbergen.
Qazaqstan men Qytaı arasyndaǵy yntymaqtastyq tarıhynyń jańa paraqshasyn ashatyn joba túsirilimi búgin máresine jetken.
«Keıingi 22 kún ishinde Qazaqstannyń ártúrli memlekettik qurylymdarynyń jan-jaqty qoldaýynyń arqasynda túsirilim tobymyz myńdaǵan shaqyrymdy artta qaldyryp, biregeı qalalarǵa bardy: kóne Túrkistannyń tarıhı únin estidik, Kaspıı jaǵalaýyndaǵy Aqtaýdyń kórkem kórinisterinen shabyt aldyq, «alma qalasy» atanǵan Almatynyń jylýlyǵyn sezindik jáne fýtýrıstik Astananyń qarqyndy damýyn kórdik. Biz baǵa jetpes kadrlardy taspalap, qonaqjaı jerdiń tórinen júrekke jeter mýzykalyq iz qaldyrdyq», dedi Hunan TV arnasynyń «Voice Beyond Horizon» baǵdarlamasynyń prodıýseri jáne bas rejısseri Lýo Sınsın.
Al tabıǵat aıasyndaǵy án saıysyn arnaıy shaqyrylǵan halyqaralyq qazylar men kórermender baǵalaǵan. Sondaı-aq eki dúrkin «Gremmı» syılyǵynyń ıegeri Ýolter Afanasev joba aıasynda Túrkistanda boı kórsetken.
Mádenıet pen týrızmdi túletýdi kózdeıtin joba aýdıtorııasy 210 mıllıonnan astam kórermenge jetetin Hunan TV telearnasy men Mango TV sıfrlyq platformasy men «Qazaqstan» ulttyq arnasynda qatar kórsetiledi. Uıymdastyrýshylardyń aıtýynsha, «Voice Beyond Horizon» halyqaralyq jobasy jańa jyldan keıin kórermen nazaryna usynylady.
