«Otandyq steıblkoın sıfrlyq ınnovasııalardy dástúrli qarjy ınfraqurylymymen biriktirip, krıpto-fıat arnalaryn keńeıtedi. Krıptovalıýtany teńgemen baılanǵan steıblkoınge aıyrbastaýǵa ári krıptokartalar arqyly saýda jasaýǵa bolady», dedi bas bank.
Byltyr Memleket basshysy sıfrlyq qarjy ónimderin damytý týraly tapsyrma bergen. Úderis qarqyndy júrip jatyr. Osyǵan baılanysty Ulttyq bank tóraǵasy Tımýr Súleımenov «Qazir tórt baǵyt boıynsha segiz qanatqaqty joba júzege asyp jatyr, alǵashqysy – Qazaqstan steıblkoıni» dedi.
32 kompanııa bankrottyqtan aman qaldy
Problemalyq kredıtter qorynyń málimdeýinshe, keıingi jyldary agrarlyq sektordaǵy qaryzdardy qaıta qurylymdaý sharalarynyń arqasynda 32 aýyl sharýashylyǵy kompanııasy bankrot bolýdan aman qaldy. Qor 2019 jyldan bastap agrosektordy maqsatty qoldaýdy kúsheıtip, qaryz júktemesin azaıtýǵa, nesıe merzimin uzartýǵa ári mólsherlemeni tómendetýge kómektesip keledi. Bul myńdaǵan jumys ornyn saqtap, strategııalyq nysandardy aman alyp qaldy.
2023 jylǵy qýańshylyq pen nóser kezinde de qaryz sharttary qaıta qaralyp, tólemderge jeńildik berildi. Jaqtyr elevatory men «Karajar Agro-2019» sııaqty kásiporyndar qaıta jandandy. Qor dereginshe, byltyr 1,85 mln tonnadan astam ónim jınalyp, 6,9 mlrd teńge salyq tólendi.
Tehnologııalyq jańartý jetkiliksiz
Elimizde bıylǵy qańtar-tamyz aılarynda negizgi kapıtalǵa salynǵan ınvestısııa 14,3%-ǵa ósti. Biraq «Halyk Finance» zertteýi boıynsha, shildeden bastap ósim qarqyny báseńdegen. Sarapshy Saltanat Igenbekova munyń bári ótken jylǵy tómen baza áseriniń álsireýi men Ulttyq qordan bólinetin transfertterdiń qysqarýyna baılanysty deıdi.
«Investısııalardyń basym bóligi qurylys pen jóndeý jumystaryna baǵyttalyp jatyr, al tehnologııalyq jańartý jetkiliksiz. Mundaı ósimniń turaqtylyǵy tómen», deıdi ol.
Máselen, bilim salasynda eń joǵary ósim tirkelse (92%), óńdeý ónerkásibinde 34,3% boldy. Kólik, energetıka, jyljymaıtyn múlik salalarynda da ósim bar.
