Saltanatty jıyn barysynda Prezıdent bilim berý salasyna súbeli úles qosqan birqatar pedagogty memlekettik nagradalarmen marapattady. Olardyń qatarynda Semeı qalasyndaǵy Geologııalyq barlaý kolledjiniń aǵylshyn tili pániniń oqytýshysy Omarbekova Aıgúl Tóleýtaıqyzy da bar. Ol «Eren eńbegi úshin» medalimen marapattalyp, bul marapatty Memleket basshysynyń qolynan alǵanyn aıtty.
Aıgúl Omarbekova óz sózinde bul marapatty úlken qurmet retinde qabyldaıtynyn aıtyp, elimizde bilim berý salasyna, ásirese sońǵy bes jylda erekshe kóńil bólinip kele jatqanyn atap ótti. Ol pedagog mártebesi týraly zań qabyldanǵanyn, tehnıkalyq jáne kásiptik bilim berý salasyna qoldaý artyp kele jatqanyn tilge tıek etti.
«Bıyl jumysshy mamandyqtar jyly bolyp jarııalandy. Biz tehnıkalyq jáne kásiptik bilim berý júıesiniń mamandary retinde geologııalyq barlaý salasyna qajet mamandardy daıarlaımyz. Búginde kolledjimizde geologtar men geofızıkterdi aǵylshyn tilinde oqytatyn toptar ashyldy», dedi ustaz.
Aıta ketý kerek, bilim berý salasyna Úkimet tarapynan da, Oqý-aǵartý mınıstrligi men jergilikti bilim basqarmalary tarapynan da úlken qoldaý kórsetilip keledi. Biz jumys istep jatqan barlyq bilim berý baǵdarlamalary kolledjdiń materıaldyq-tehnıkalyq bazasyn nyǵaıtýǵa, sondaı-aq básekege qabiletti mamandar daıarlaýǵa baǵyttalǵan.
«Salamyzdaǵy basty basymdyqtardyń biri — kolledjimizde geologtar men geofızıkterdi aǵylshyn tilinde oqytatyn toptardyń ashylýy. Qazirgi tańda bul — eńbek naryǵynda óte ózekti baǵyt. Sebebi qazirgi zaman mamandary tek aǵylshyn tilin jaqsy meńgerip qana qoımaı, sheteldik áriptestermen erkin tildese alýy qajet. Bul óz kezeginde bizdiń túlekterge aǵylshyn tilin úırene otyryp, halyqaralyq bilim keńistigine enýge jáne sheteldik jumys kúshin almastyra alatyn maman retinde qalyptasýǵa múmkindik beredi», dedi Aıgúl Tóleýtaıqyzy.
