Máselen, qylqalam sheberiniń 1949 jyly respýblıkalyq sýret kórmesine qoıylǵan «Kóktemgi egistik» týyndysynda Alataý baýraıyna qonǵan aýyl mańyndaǵy alqapta qaınap jatqan eńbek maıdany beınelengen. Aspanmen talasqan muz shyńdar, alqap basyna tigilgen kıiz úı, tútini burqyraǵan qazan-oshaq, artyna aǵash dońǵalaqty dánsepkish tirkegen kóne traktor, oǵan mingesken sharýaqor jurt – osynyń bári sol dáýirdegi tirshilik tynysyn dóp basyp kórsetip turǵandaı.
Sýretshi shyǵarmashylyǵynyń ózegi – pań dalanyń kerim tabıǵaty, qazaq halqynyń dástúrli sharýashylyǵy, turmys-tirshiligi, qarapaıym eńbek adamdary. Halyq sýretshisiniń «Kitap ustaǵan qyz», «Qarııanyń portreti», «Qurmanǵazy» týyndylary da mýzeıdiń altyn qoryndaǵy qundy jádigerler qatarynan oryn alǵan.
«Ulttyq beıneleý óneriniń negizin qalaýshylardyń biri, sheber keskindemeshi Moldahmet Kenbaevtyń bir ǵana «Kitap ustaǵan qyz» týyndysynyń ózinen san alýan boıaýdyń názik úılesimin kóremiz. Qylqalam sheberi aq tústiń ózine basqa boıaýlardy ústeı otyryp, jandy beıneleı bilgen. Mysaly, «Kitap ustaǵan qyz» atty kórkem sýrette beınelengen qazaq qyzynyń aq kóılegine zer salyp qarasaq, mundaǵy sarǵysh, kógildir boıaýlarmen astasyp jatqan aq tús sýretshiniń qaıtalanbas qoltańbasyn aıqyndap tur. Jas boıjetkenniń ústindegi kók qamzolynyń ózinen qyzǵylt, kók, jasyl boıaýlardyń quıyla úılesip ketkenin ańǵarýǵa bolady. Ústelde kitap oqyp otyrǵan jas arýdyń tip-tik boıy, oıly júzi, qalyń qara shashy, toqpaqtaı uzyn burymy, uzyn kirpikteri, ústindegi ulttyq kıimi – bári-bári bir-birimen jarasymdy úılesip, barsha qazaq qyzdaryna ortaq kórkem beıneni berip tur», deıdi oblystyq tarıhı-ólketaný mýzeıiniń ǵylymı qyzmetkeri Názıma Otasheva.
Qostanaı oblysy
