Sýret «Egemen Qazaqstannyń» arhıvinen alyndy
Transkaspıı dáliziniń tynysy
«Byltyr bizdiń terrıtorııamyz arqyly júk tasymaldaý kólemi 1 mlrd tonnadan asty. Sonymen qatar elimizdiń tranzıttik áleýetin arttyrýǵa áli de zor múmkindik bar. «Soltústik – Ońtústik» kólik dálizi Parsy shyǵanaǵy men Ońtústik Azııa elderiniń naryǵyna tikeleı jol ashady. Al «Shyǵys – Batys» dálizi men Qytaıdyń «Bir beldeý, Bir jol» jahandyq bastamasy Qazaqstannyń Eýrazııadaǵy negizgi qurlyq joly retindegi rólin kúsheıte túsedi», degen edi Prezıdent bıylǵy Joldaýynda.
«Qazaqstan temir joly» ulttyq kompanııasynyń óndiristik prosester jónindegi basqarýshy dırektory Baýyrjan Pazylbekulynyń sózinshe, jobany júzege asyrý barysynda 1,6 mln-ǵa jýyq temirjol shpaly, 113,3 myń tonna rels pen túrli elektr jabdyǵy óndirildi. 260-tan astam nysan – kópir, sý ótkizgish qubyr men jol ótkelderi salyndy. Qurylysqa 456 tehnıka, 1,5 myńnan astam qurylysshy, 7 myńǵa jýyq shaǵyn jáne orta bıznes ókilderi tartyldy.
«Biz tek jańa joldar salyp qoıǵan joqpyz, sonymen qatar el kompanııalaryna úlken múmkindik ashtyq. Olar buryn-sońdy bolmaǵan kólemde tapsyrys oryndap, erekshe tájirıbe jınady. Qazir bizdiń zaýyttar rels pen shpal shyǵarýdy, elektr jabdyqtaryn óndirýdi tolyq jolǵa qoıdy. Jergilikti kásiporyndardyń áleýeti ósip, bilikti mamandar qatary artty. Mundaı jobalar otandyq ekonomıkanyń myqty tiregine aınalady», dedi ol.
Aıtýynsha, jańa joldardyń paıdalanýǵa berilýi osy ýchaskeniń ótkizý qabiletin 5 ese arttyrady.
«Buryn táýligine 12 jup poıyz ótse, endi 60 jup poıyzǵa deıin qabyldap, jibere alamyz. Bul – eksport kóleminiń ulǵaıýyna, Qytaı men Eýropa arasyndaǵy tranzıttik tasymaldardyń ósýine tikeleı yqpal etetin qadam. Biz bul jobany eldiń ekonomıkasyn jańa deńgeıge shyǵaratyn strategııalyq bastama dep sanaımyz», dedi Baýyrjan Pazylbekuly.
Strategııalyq máni joǵary
Kólik vıse-mınıstri Jánibek Taıjanovtyń aıtýynsha, bul ýchaske elimizdi Qytaımen Dostyq shekaralyq beketi arqyly baılanystyratyndyqtan tranzıttik jáne eksporttyq áleýetti arttyra túsedi. Ekinshiden, qosymsha joldar jetkizý merzimin qysqartady.
Sýretti túsirgen – Erlan OMAR, «EQ»
«Úshinshiden, joba halyqaralyq kólik dálizderin damytýǵa úles qosady. Qytaı, Ortalyq Azııa, Reseı, Eýropa, Parsy shyǵanaǵy elderin baılanystyrady. Sáıkesinshe, elimizdiń aımaqtyq hab retindegi mártebesin bekitedi. Tórtinshiden, tranzıt kóleminiń artýy valıýtalyq túsimdi ulǵaıtady, qosymsha ınfraqurylym qurylysyna serpin beredi, aımaqtarda jańa jumys oryndary ashylady. Besinshiden, strategııalyq temirjol torabyn baqylaýda ustaý jahandyq logıstıkalyq tizbektegi senimdi seriktes retindegi rólin kúsheıtedi», dedi Jánibek Taıjanov.
Qorǵas baǵyty da – basty nazarda
Osy jobanyń arqasynda Qorǵas baǵytynyń da mańyzy artyp otyr. «Temirjol jóndeý» JShS bas dırektory Aıbek Terekbaevtyń aıtýynsha, qazir bul jeli táýligine 16–18 jup poıyzǵa qyzmet kórsetip otyr.
«Alaıda bıyldyń ózinde 25-ke jýyq ótinim tústi. Sol sebepti ótkizý múmkindigin arttyrý – ýaqyt talaby. Máseleni sheshý úshin uzyndyǵy 297 shaqyrym bolatyn aýqymdy jańǵyrtý jobasyn júzege asyryp jatyrmyz. Joba aıasynda jańa toraptar salynyp jatyr ári avtomatty buǵat júıesi engiziledi. Bul poıyzdardyń qozǵalysyn tıimdi basqarýǵa, qaýipsizdikti arttyrýǵa, tasymal ýaqytyn qysqartýǵa múmkindik beredi», deıdi kompanııa basshysy. Onyń aıtýynsha, Qorǵas baǵytyn keńeıtý elimizdi jahandyq tasymal júıesine engizedi. Sebebi bul tar ótkeldi sheshý Qytaı – Eýropa baǵyty boıynsha tranzıt kólemin arttyryp, elimizdiń negizgi kólik dálizderindegi shekteýlerdi joıady.
