Foto: Almaty qalasy ákimdiginiń baspasóz qyzmeti
Premer-mınıstrdiń orynbasary – ulttyq ekonomıka mınıstri Serik Jumanǵarınniń jetekshiligimen ótken keńeste ınflıasııany tejeý máseleleri qaraldy. Jıyn barysynda jyl sońyna deıin baǵany turaqtandyrýǵa baǵyttalǵan naqty qadamdar sóz boldy.
«Jyldyq ınflıasııanyń negizgi qozǵaýshysy – aqyly qyzmetter. Qyrkúıekte aqyly qyzmetterdiń ósý qarqyny báseńdep, tamyzdaǵy 1,4%-ben salystyrǵanda 1%-ǵa deıin tómendegen. О́ıtkeni 2025 jylǵa josparlanǵan kommýnaldyq qyzmet tarıfterin túzetý sharalary aıaqtaldy. Buǵan deıin aıtylǵandaı, qazan aıynan bastap kommýnaldyq qyzmet tarıfterin kóterý josparda joq. Áleýmettik mańyzy bar azyq-túlik taýarlarynyń baǵasy da turaqtalýda. Qyrkúıektiń sońǵy aptasynda áleýmettik mańyzy bar azyq-túlik ındeksi óspedi. Qant, tuz, makaron, kúrish, sút jáne áleýmettik mańyzy bar kókónisterdiń baǵasy arzandady», delingen habarlamada.
Jalpy aı qorytyndysynda nan-toqash ónimderi men jarmalar 0,1%-ǵa, et 0,2%-ǵa, maı 0,2%-ǵa, jumyrtqa 3,1%-ǵa, jemis pen kókónis 1,9%-ǵa arzandaǵan.
Ásirese qyryqqabat baǵasynyń aıtarlyqtaı tómendeýi erekshe nazarǵa alyndy. Jyldyń alǵashqy jartysynda edáýir qymbattaǵan bul ónim mamyr aıymen salystyrǵanda 52%-ǵa arzandaǵan. Basqa da maýsymdyq ónimderdiń baǵasy tómendeý úrdisin kórsetti.
Saýda jáne ıntegrasııa birinshi vıse-mınıstri Aıjan Bıjanovanyń aıtýynsha, barlyq óńirlerde óndirýshilermen áleýmettik mańyzy bar azyq-túliktiń baǵasyn jyl sońyna deıin ustap turý jóninde kelisimder jasaldy. Qazan men jeltoqsan aralyǵynda el boıynsha aptasyna keminde bir ret, demalys pen merekelik kúnderdi qosa eseptegende, barlyǵy 1619 aýyl sharýashylyǵy jármeńkesi ótedi.
Astanada iri saýda jelileri Aýyl sharýashylyǵy mınıstrligimen birge sıyr etin óndirýshilerden tikeleı satyp alý tájirıbesin iske asyrdy. Tıimdiligin dáleldegen bul bastama endi aımaqtarǵa keńeıtiletin bolady.
«Bereke Fest» aksııasy aıasynda elimizdiń 80 saýda jelisi agrofırmalarǵa et pen basqa da áleýmettik mańyzdy ónimderdi tikeleı sýpermarket sórelerine jetkizýge múmkindik berdi. Saýda jelileri áleýmettik jaýapkershilik tanytyp, osyndaı ónimder úshin arnaıy buryshtar uıymdastyrdy. Qazir ákimdikter jáne bıznes ókilderimen birlesip, Respýblıka kúnine arnalǵan merekelik jármeńkeler men aksııalardy uıymdastyrý ústindemiz», dedi Aıjan Bıjanova.
Aýyl sharýashylyǵy mınıstrliginiń dereginshe, óńirlerdiń basym bóligi turaqtandyrý qoryna jańa ónim jetkizý jónindegi kelisimderdi aıaqtady. Qorǵa barlyǵy 245 myń tonna ónim qabyldanbaq, onyń ishinde 146,7 myń tonna kartop, 35,3 myń tonna sábiz, 27,4 myń tonna pııaz jáne 36 myń tonna qyryqqabat bar. Alaıda Aqtóbe jáne Ulytaý oblystarynda qyryqqabat satyp alý kólemi 50%-dan sál ǵana asqandyqtan, kesheýildeý baıqalady. Osyǵan oraı vıse-premer mınıstrlikke atalǵan óńirlerge jetkizýshiler tabýǵa qoldaý kórsetýdi tapsyrdy.
