Foto:atr.kz
Oblys ákiminiń orynbasary Qaırat Nurtaev munaıly shaharda sezilgen ıiske baılanysty qurylǵan jedel shtabtyń jınalysyn ótkizdi. О́rt oshaqtaryn anyqtaý úshin júrgizilgen monıtorıng kezinde órttiń Atyraý qalasynan 20 shaqyrym qashyqta tutanǵany anyqtalǵan.
«Atyraý oblystyq tótenshe jaǵdaılar departamentiniń jedel kezekshisi keshe, 6 qazanda saǵat 23:00-de Atyraý qalasynan Kaspıı teńizine qaraı shamamen 20 shaqyrym qashyqtyqta 1 gektarda qurǵaq shóptiń janǵanyn anyqtady. Kezekshi quramnyń kúshimen búgin, 7 qazanda saǵat 01:12-de órt oshaǵy tolyq joıyldy», dep habarlady departamenttiń ımıdjdik jumys jáne syrtqy kommýnıkasııalar toby.
Al Qurmanǵazy aýdanynda 67 shaqyrym qashyqtaǵy «Jarkasa» kanalynyń qarsy betinde, Kaspıı teńiziniń jaǵalaýyndaǵy 30 gektarda qamys qopasy byqsyp jatyr.
«Osy kezge deıin 12 gektardaǵy byqsý sóndirildi. Eldi mekenderge tónip turǵan qaýip joq. Kaspıı teńiziniń jaǵalaýyna taıaý mańdaǵy órtti sóndirý úshin oblystyq tótenshe jaǵdaılar departamentiniń kúshteri men quraldary jiberildi», dep málimdedi departamenttiń ımıdjdik jumys jáne syrtqy kommýnıkasııalar tobynan.
