Foto:istockphoto.com
Mınıstrdiń aıtýynsha, eń joǵary seısmıkalyq qater Almaty qalasy men Almaty oblysyna, sondaı-aq halyq pen ınfraqurylym tyǵyz ornalasqan Jambyl, Túrkistan jáne Shyǵys Qazaqstan oblystaryna tán.
«Ulttyq qaýipsizdik pen ornyqty damýdy qamtamasyz etý maqsatynda jańa Qurylys kodeksinde osy máselege arnalǵan jeke taraý engiziledi. Normalar keshendi túrde seısmıkalyq qaterdi baǵalaýdy, jańa nysandardy seısmo-oqshaýlaý tehnologııasymen jobalaýdy, qurylys alańdaryn tańdaý men birinshi deńgeıdegi mańyzdy nysandarǵa ınjenerlik-seısmometrııalyq baqylaý júrgizýdi kózdeıdi», dedi Ersaıyn Naǵaspaev.
Sonymen qatar, mınıstr qurylys salasynda sapa men qaýipsizdikti qamtamasyz etý úshin naryqtaǵy qatysýshylardyń biliktiligin arttyrý qajettigin atap ótti. Búginde salada shamamen 80 myń lısenzııa tirkelgenimen, olardyń edáýir bóligi qaǵaz júzinde ǵana bar ekeni anyqtalǵan. Kóptegen kompanııanyń óndiristik bazasy da, tájirıbeli ınjenerleri de joq bolyp shyqty.
«Olardyń basym bóliginde óndiristik baza da, bilikti ınjenerler de, naqty jobalarǵa qatysý tájirıbesi de joq. Mundaı jaǵdaı sapa men qaýipsizdikti tómendetip qana qoımaı, memlekettik tapsyrystarǵa jalǵan kompanııalardyń qatysýyna jol ashyp, saladaǵy eńbek naryǵynyń shynaıy jaǵdaıyn kórsetpeı otyr.Atalǵan máseleni sheshý úshin memlekettik aqparattyq júıelermen ózara birikken lısenzıattardyń elektrondy tizilimi qurylady», dedi Ersaıyn Naǵaspaev.
