Foto: Ashyq derekkózden
Túzetýge saı ulttyq ýran kompanııasyna ýran óndirý boıynsha aıryqsha quqyqtar beriledi.
Zań jobasy kómirsýtekti barlaý men óndirýge ınvestısııa tartýǵa, sondaı-aq ýran ónerkásibinde memleket múddesin qorǵaýǵa baǵyttalǵan. Atap aıtqanda, ulttyq ýran kompanııasyna ýran óndirý operasııalaryn júrgizýge aıryqsha quqyqtar berý, ýrannyń paıdaly qazbalary men ken oryndaryn barlaý úshin aýmaqtardy rezervte ustaý múmkindigin berý josparlanyp otyr.
Sondaı-aq, kómirsýtekterdi ıgerilmegen jerlerde barlaý men óndirý kúsheıtiledi.
Zań jobasyna «az zerttelgen aýmaqtar» túsinigi engizilgen. Osyndaı aımaqtarda qyzmetin júzege asyratyn jer qoınaýyn paıdalanýshylarǵa geologııalyq barlaý lısenzııasynan kómirsýtekterdi barlaýǵa jáne óndirýge arnalǵan úlgilik kelisimshartqa kóshýge basym quqyq beriledi. Esesine, kompanııalar kelisimshart aýmaǵynyń keminde 30 paıyzyn qamtıtyn 2D seısmıkalyq zertteýler júrgizýge jáne alǵashqy úsh jyl ishinde kem degende bir barlaý uńǵymasyn burǵylaýǵa mindetti bolady.
Budan bólek, jerlerdi nashar barlanǵan aýmaqtarǵa jatqyzý tártibi aıqyndalyp, mundaı jer qoınaýy ýchaskelerinde kómirsýtekterdi barlaýǵa jáne óndirýge arnalǵan úlgilik kelisimshart nysany belgilenedi. Az zerttelgen aýmaqtardan iri ken orny tabylǵan jaǵdaıda jer qoınaýyn paıdalanýshydan jer qoınaýyn paıdalaný quqyǵynyń keminde 50 paıyzyn ulttyq kómirsýtek kompanııasyna berý talap etiledi. О́z kezeginde kompanııa salyq esebine súıene otyryp, geologııalyq barlaý shyǵyndarynyń bir bóligin óteýi kerek.
Sondaı-aq zerttelmegen aýmaqtarda aýksıon rásimin jeńildetý jáne onyń uzaqtyǵyn bir aı dep (basqa aýmaqtarda eki aı jáne odan da kóp) belgileý usynylady. Eger aýksıonǵa bir qatysýshy jiberilse, ol jeńimpaz dep tanylady (basqa aýmaqtarda bul jaǵdaıda aýksıon ótpedi dep tanylady). Jer qoınaýyn paıdalanýshylarǵa kómirsýtekti barlaýǵa jáne óndirýge arnalǵan kelisimsharttardy olardyń qoldanylý merziminiń alǵashqy úsh jyly ishinde satýǵa tyıym salady. Ulttyq kómirsýtegi kompanııalaryna aýmaqty rezervteýge úsh jyldyq shekteý, sondaı-aq tikeleı kelissózder arqyly jer qoınaýyn paıdalaný quqyǵyn alýǵa bolatyn úsh jyldyq merzim de belgilenedi.
