Kórmede patrýldik qyzmettiń kúndelikti jumysy, jedel is-sharalar, balalarmen qarym-qatynas, tótenshe jaǵdaılardyń saldaryn joıý, sondaı-aq kınologtar, krımınalıster men arnaıy bólim qyzmetkerleriniń kúndelikti qyzmeti beınelengen aıshyqty fotosýretter qoıylǵan.
«Biz forma kıgen polısııa qyzmetkeriniń de osy ózimiz ómir súrip jatqan qoǵamnyń qarapaıym bir múshesi ekenin kórsetkimiz keldi. Onyń da óz otbasy, ata-anasy, jary, bala-shaǵasy, ómirlik ustanymy, moınyna artylǵan jaýapkershiligi bar. Polısııa qyzmetkeri bolý úshin tek zańdy jattap alyp, ony jurttan talap etý jetkiliksiz. Tártip saqshylarynyń boıynda sonymen qatar, elshildik, janashyrlyq, batyldyq, ustamdylyq sııaqty adamı qasıetter astasyp jatýy kerek», deıdi oblystyq polısııa departamentiniń baspasóz hatshysy Karına Bazarbaeva.
Kórmege kelýshiler arnaıy shuǵyl jasaq qyzmetkerleriniń urys qımylyn, krımınalıst, kınolog mamandardyń jattyǵýyn tamashalady. Polısııa qyzmetkerleri kópshilik qoıǵan suraqtarǵa jaýap berip, ózderi kúndelikti qyzmette paıdalanatyn arnaıy quraldarymen tanystyrdy. Kınologtar qyzmettik ıtterdiń tapsyrmany qalaı atqaratynyn kórsetti.
Kórme barysynda polısııa qyzmetkerleri balalarǵa arnalǵan vıktorınalyq oıyn ótkizip, qaǵilezdik tanytqan bóbekterge oıynshyq patrýldik mashınalar tartý etti.
«Bizdiń polısııa» fotokórmesi qoǵam men quqyq qorǵaý organdary arasyndaǵy senimdi nyǵaıtýǵa baǵyttalǵan. Polısııa qashanda halyqpen birge jumys isteıdi. Bul – jalań uran emes, polısııa qyzmetiniń basty ustanymy. Biz halyqqa ashyq ári adal qyzmet etýge árqashan daıynbyz», deıdi is-sharany uıymdastyrýshylar.
Qostanaı oblysy
