«Elimaı-M» bıylǵy maýsymda ekinshi lıganyń Soltústik-shyǵys konferensııasynda tabysty óner kórsetip, 37 upaımen úzdik úshtikke engen. Osyǵan oraı, aımaq basshysy komanda oıynshylary men jattyqtyrýshylaryn jeńisterimen quttyqtap, aldaǵy oıyndaryna tabys tiledi.
«Bar bolǵany eki maýsym qatarynan ekinshi lıgada oınap, úzdik úshtikke ený – qajyrly eńbektiń, naǵyz tabandylyq pen shynaıy komandalyq rýhtyń nátıjesi. «Elimaı-M» – tómengi lıgada Abaı oblysynyń namysyn qorǵap júrgen maqtanyshymyz! Komandanyń tolyǵymen jergilikti jastardan jasaqtalýy jáne bapkerler quramynyń óz óńirimizdiń mamandarynan quralýy bul Semeı fýtbol mektebiniń áleýetiniń zor ekenin kórsetedi. «Qazaq fýtbolynyń otany – Semeı» degen atqa laıyqty ekenimizdi dáleldep otyr. Sizderdiń árqaısyńyzdy erteńgi úlken fýtboldyń úmiti, negizgi quramnyń senimdi oıynshysy, bolashaq jeńisterdiń bastaýy dep esepteımin. Jergilikti jastardyń osylaı ósip, kásibı deńgeıge kóterilýi – bizdiń óńirdegi júıeli jumystyń, sportty qoldaýdyń, bapkerler eńbeginiń nátıjesi», dedi oblys ákimi.
Kezdesý barysynda aımaq basshysy jankúıerler qozǵalysynyń ardageri Saıasat Sársembınov, «Elimaı» FK AQ dırektorlar keńesiniń músheleri Asqar Uranhaev, Serik Baıǵalıev pen Aırat Bazenovti jáne bapkerlik quram men fýtbolshylardy marapattady.
«Jankúıerler atynan jergilikti ákimdikke úlken alǵysymdy bildiremin. Búgingi kúni bizdiń jas fýtbolshylarymyz joǵary deńgeıge jetip, ózderiniń sheberligin kórsetip otyr. «Elimaı» klýbynyń jetistigi arqyly Semeı qalasy taǵy da qazaq fýtbolynyń altyn besigi, otany ekenin dáleldep otyr», dedi jankúıerler qozǵalysynyń ardageri Saıasat Sársembınov.
Aımaq basshysy «Spartak» stadıonyna baryp, «Elimaı» fýtbol komandasynyń oıynshylarymen, bapkerlik qurammen kezdesti.
«Semeı – qazaq fýtbolynyń otany. Dál osy jerde 1913 jyly Qazaqstandaǵy alǵashqy fýtbol matchy ótken edi. Áıgili jazýshy Muhtar Áýezov komanda quramynda oınady. «Elimaı» fýtbol klýby tarıhı dástúrdi laıyqty jalǵastyryp keledi. Alda mańyzdy eki oıyn tur. Jankúıerler tek jeńis kútedi. Biz sizderdi el chempıonatynda ǵana emes, aldaǵy ýaqytta Eýrokýbok arenalarynda Qazaqstannyń namysyn qorǵaıtyn komandalardyń qatarynan kórgimiz keledi. Memleket basshysy Qasym-Jomart Toqaev bıylǵy Joldaýynda fýtbol klýbtarynyń kommersııalanýy jaıly atap ótken bolatyn. Bizdiń «Elimaı» fýtbol klýby Prezıdentimizdiń bastamasyn qoldap, qazir jańa júıege ótýdiń negizin qalap jatyr. Iаǵnı, naǵyz halyqtyq komandaǵa aınalýdy tańdap, sol baǵytta jumys isteýde. Aldaǵy ýaqytta klýb aksııalary bırjaǵa shyǵarylady. Bul Qazaqstan úshin zamanaýı, novatorlyq, jańa jol dep aıtýǵa bolady. Jankúıerler men ınvestorlar klýb tarıhynyń bir bóligine aınalyp, ózderiniń úlesin qosyp, damýyna áser etýge múmkindik alatynyna kúmánimiz joq. Sol arqyly biz klýbty basqarýdyń naǵyz jańashyl úlgisin elimiz boıynsha birinshi bastaǵaly otyrmyz», dedi oblys ákimi.
2022 jyly qaıta qurylǵan «Elimaı» qysqa ýaqyt ishinde el fýtbolynyń basty klýbtarynyń birine aınaldy. 2023 jylǵy maýsymda komanda Birinshi lıgada chempıon atanyp, 2024 jyly Qazaqstan Premer-lıgasyna qaıta oraldy. Búginde semeılik klýb el chempıonatynyń 24 týrynan keıin 42 upaı jınap, týrnırlik kestede 5-inshi orynda keledi. Alda maýsymnyń sońǵy eki týrynda elimaılyqtar «Turan» jáne «Atyraý» komandalarymen kezdesedi.
Abaı oblysy
