Saltanatty sharaǵa QR ǵylym jáne joǵary bilim mınıstri Saıasat Nurbek, QazUÝ Dırektorlar keńesiniń tóraǵasy Qaırat Mámı, QazUÝ Basqarma Tóraǵasy-Rektory Janseıit Túımebaev, QR Senatynyń depýtaty Bıbigúl Jeksenbaı, Almatydaǵy QHR bas konsýly Szıan Veı men ózge de tanymal tulǵalar qatysty.
Sharada mınıstr Saıasat Nurbek jastardy arnaıy quttyqtap, oqýda tabys tiledi.
«QazUÝ tek bilim ordasy emes, tulǵa qalyptastyratyn, bilikti maman daıarlaıtyn, ǵylym men ınnovasııanyń ortalyǵy. Memleket basshysy Qasym-Jomart Toqaev: «Jastar otanshyl, bilimpaz, eńbekqor, únemshil, ádil ári janashyr bolýy shart», - dep atap ótken bolatyn. Prezıdent aıtqan qasıetterdi boıyna sińirgen jas býyndy tárbıeleýde QazUÝ-dyń róli zor. Ýnıversıtet tek teorııalyq bilim berip qana qoımaı, stýdentterdi ómirlik ustanymdary aıqyn, jaýapkershiligi joǵary, básekege qabiletti maman retinde qalyptastyrýda aýqymdy jumystar atqarýda», - dedi mınıstr.
QazUÝ-dyń Basqarma Tóraǵasy – Rektor Janseıit Túımebaev: «Uly ustaz, oıshyl ál-Farabıdiń «Isim ońsyn deseńiz, sol istiń mamany bolyńyz» degen qaǵıdasyn esten shyǵarmańyzdar. Sizderdiń tárbıeli shákirt bolyp, bilikti maman, elin súıetin tulǵaly azamat bolyp shyǵatyndaryńyzǵa senemin», – dedi rektor.
Jańa oqý jylynda QazUÝ-ǵa bakalavrıat, magıstratýra jáne doktorantýra baǵyty boıynsha barlyǵy 11 530 stýdent qabyldandy.
Bakalavrıatqa oqýǵa túsken jastardyń ishinde 116 «Altyn belgi» ıegeri men 27 halyqaralyq olımpıada júldegeri bar. Bıyl 2500-den astam sheteldik stýdent ál-Farabı atyndaǵy QazUÝ-dy tańdaǵan.
Kesh barysynda alǵash ret QazUÝ fılıaldarynda bilim alatyn stýdentter de óz ónerlerin pash etti.
Saltanatty kesh qazaq estradasy juldyzdarynyń án shashýymen jalǵasyp, jastardyń bı keshine ulasty.
