Forým aıasynda mınıstr Eýropalyq komıssııanyń Halyqaralyq seriktestik jónindegi komıssary Iozef Sıkelamen jáne tatý kórshilik pen keńeıtý máselelerine jónindegi komıssary Marta Kospen kelissózder júrgizdi. Kezdesý barysynda taraptar energetıkalyq qaýipsizdik, «jasyl» ekonomıkaǵa kóshý máselelerin talqylady.
Erlan Aqkenjenov Qazaqstannyń 2060 jylǵa deıin kómirtegi beıtaraptyǵyna qol jetkizýdi strategııalyq maqsat retinde aıqyndap otyrǵanyn atap ótti. Sonymen qatar, eldiń «jasyl» ekonomıkaǵa kóshý úderisinde pragmatıkalyq ári teńgerimdi ustanymdy basshylyqqa alatynyn jetkizdi. Onyń aıtýynsha, bul prosess jańartylatyn energııa kózderin damytýmen qatar, qazirgi tańda dástúrli generasııaǵa negizdelgen ulttyq energetıkalyq júıeniń senimdiligin qamtamasyz etýi tıis.
Sapar barysynda ınvestısııa tartý máselesine erekshe nazar aýdaryldy. Mınıstr Eýropalyq qaıta qurý jáne damý bankiniń (EQDB) prezıdenti Odıl Reno-Bassomen, Fransýz damý agenttiginiń (AFD) dırektory Sırıl Belemen jáne Italııanyń «Cassa Depositi i Prestiti» kompanııalar toby (CDP) basshylarymen kezdesti.
Sapardyń negizgi nátıjeleriniń biri – Qazaqstan men Eýropanyń jetekshi qarjy uıymdary Eýropalyq qaıta qurý jáne damý banki (EBRD) men Eýropalyq ınvestısııalyq bank (EIB) arasynda yntymaqtastyq týraly memorandýmdarǵa qol qoıylýy boldy. Qujattar jańartylatyn energııa kózderin damytý, elektr jelilerin jańǵyrtý jáne Qambar-Ata GES-1 sekildi óńirlik jobalarǵa ınvestısııa tartýǵa baǵyttalǵan.
Sondaı-aq forým aıasynda German halyqaralyq yntymaqtastyq jónindegi qoǵamy (GIZ) uıymdastyrǵan «Ortalyq Azııadaǵy seriktestik dıalogyna» Qazaqstan, Qyrǵyzstan, О́zbekstan, Tájikstan jáne Túrikmenstannyń energetıka mınıstrleri qatysty. Basqosýda Erlan Aqkenjenov óńirlik elektr saýdasy, gıdroenergetıka jáne jańartylatyn energııa standarttary boıynsha Qazaqstannyń ustanymyn bildirdi.
– Bizdiń Brıýsselge saparymyz Eýropamen energetıkalyq áriptestikti tereńdetýge degen ózara qyzyǵýshylyqtyń joǵary ekenin kórsetti. Qazaqstan – senimdi energııa jetkizýshi el jáne «jasyl» energetıka men sýtegi óndirisinde Eýropa úshin strategııalyq seriktes bolýǵa daıyn. EIB jáne EBRD-pen jasalǵan kelisimder – elimizdiń eýropalyq bızneske turaqty uzaqmerzimdi jobalarǵa arnalǵan ınvestısııalyq tartymdylyǵyn aıqyndaıdy, – dedi QR Energetıka mınıstri Erlan Aqkenjenov.
