Foto: Ulttyq olımpıada komıteti
Jarys Beeline Arena sport kesheninde Nomad Table Tennis Academy uıymdastyrýymen, QR-nyń Týrızm jáne sport mınıstrligi jáne Qazaqstan ústel tennısi federasııasynyń qoldaýymen ótkiziledi. Demeýshiler Aspan Holding jáne VD Stroy Engineering kompanııalary.
Týrnırdiń jalpy syıaqy qory – 115 000 AQSh dollaryn quraıdy.
Prezıdent kýbogi – otandyq ústel tennısi tarıhyndaǵy jańa beles, el sportynyń halyqaralyq deńgeıge kóterilýine jol ashatyn mańyzdy qadamdardyń biri. Bul týrnır elimizdiń túkpir-túkpirinen jáne shetelden kelgen úzdik tennısshilerdi bir alańda toǵystyratyn sport merekesine aınalmaq.
Jarysqa 250-den astam sportshy, 50-ge jýyq bapker jáne 30 tóreshi qatysady. Qatysýshylar qatarynda Astana, Almaty, Shymkent, Qaraǵandy óńirlerinen, sondaı-aq Ońtústik Koreıa, Qytaı, Vengrııa, Mysyr, Malaızııa, Iran, Saýd Arabııasy sııaqty elderden kelgen tennısshiler bar.
Jarys sanattary
Týrnır jeke jáne komandalyq jarys túrlerinde tórt sanat boıynsha ótedi:
U-11 – 2014 jyly týǵandar jáne 11 jasqa deıingiler;
U-16 – 2009 jyly týǵandar jáne 16 jasqa deıingiler;
Open 17+ – 2008 jyly týǵandar jáne odan úlkender;
Team event – Komandalyq saıys.
Týrnırdiń eń kópten kútken jáne erekshe sáti – álemdik ústel tennısiniń ańyz tulǵalary qatysatyn shoý-match. Astanada bir sahnada óner kórsetetin juldyzdar:
Xu Xin (Qytaı) – ústel tennısinen álemniń eks-birinshi raketkasy;
Fang Bo (Qytaı) – álem chempıonatynyń kúmis júldegeri;
Werner Schlager (Avstrııa) – álem chempıony (2003);
Joo Sae-hyuk (Koreıa) – álem jáne Olımpıada júldegeri.
El namysyn qorǵaıtyn jetekshi sportshylar qatarynda: Kırıll Gerasımenko, Alan Qurmanǵalıev, Aıdos Kenjeǵulov, Eskendir Harkı, Záýresh Akasheva, Sarvınoz Mırkadırova, Janerke Kóshkimbaeva jáne Ánel Baqyt bar. Olardyń qatysýy týrnırdiń deńgeıin arttyryp, jas býynǵa úlken shabyt syılaıdy.
Jarys kestesi
- 24 qazan – qatysýshylardyń kelýi, jattyǵý, press-konferensııa
• 25 qazan – saltanatty ashylý rásimi, jeke birinshilik (U-11, U-16)
• 26 qazan – jeke birinshilik (U-11, U-16)
• 27 qazan – komandalyq birinshilik jáne jeke jarys (Open 17+)
• 28 qazan – jartylaı fınaldyq kezdesýler
• 29 qazan – fınaldyq oıyndar jáne marapattaý rásimi
Prezıdent kýbogi – sport mádenıetin damytýǵa, jastar arasynda ústel tennısin keńinen nasıhattaýǵa jáne halyqaralyq yntymaqtastyqty nyǵaıtýǵa baǵyttalǵan. Bul týrnır tek jarys alańy ǵana emes, jas talanttar men álemdik sheberlerdiń toǵysatyn ortasy bolmaq.
Barlyq qala turǵyndary men qonaqtary úshin týrnırge kirý tegin!
Bul – kásibı sportshylar oıynyn tamashalap, otandyq tennısshilerdi qoldaýǵa tamasha múmkindik.
