Sýretti túsirgen – Jumabaı Musabek
Memleket tarapynan qyzylshanyń ár tonnasyna 25 myń teńge kóleminde sýbsıdııa qarastyrylǵan. Buǵan qosa, zaýyttar qosymsha 15 myń teńge ústemeaqy tóleıdi. Nátıjesinde, sharýalardyń tátti túbirdi ótkizý baǵasy tonnasyna 40 myń teńgege jetip otyr. Oblystyq aýyl sharýashylyǵy basqarmasynyń málimetinshe, bıyl Jetisýda qant qyzylshasy shamamen 12,2 myń gektarǵa egilgen. Aqsý, Alakól, Sarqan, Eskeldi, Kóksý aýdandarynyń sharýalary ónim jınaýǵa kirisip te ketti. Qazir 240 gektar alqaptan 10 myń tonnadan astam ónim jınaldy. Ortasha túsim gektaryna 422,6 sentnerdi qurap otyr. Jınaý jumystaryna 113 kombaın men 52 japyraq jınaǵysh mashına jumyldyrylǵan. Bul tehnıkalardyń qýattylyǵy kúnine 700 gektarǵa deıin ónim jınaýǵa múmkindik beredi.
Odan bólek, tuqym, tyńaıtqysh pen pestısıd satyp alýǵa da memleketten kómek beriledi. Sharýalarǵa jeńildetilgen janar-jaǵarmaı men lızıng arqyly jańa tehnıka usynylǵan. Qyzylsha baǵytyndaǵy 25 servıstik-daıyndaý ortalyǵy jumys isteıdi, olardyń qolynda 450-ge jýyq arnaıy tehnıka bar.
«Bıyl 40 gektarǵa qant qyzylshasyn ektik. Jınaý jumysy qyzý júrip jatyr. Barlyq qajetti tehnıka bar, ónimdi ýaqtyly ótkizip úlgerýge tyrysamyz. Byltyr qyrkúıekte tapsyryp, on kúnde jınap alsaq, bıyl jumysty qazanda bastadyq. Jerdiń ylǵaldy bolýy ónimge oń áserin tıgizedi dep oılaımyn. Aýdanymyzdaǵy zaýyt maıburshaqty da qabyldaıdy, sol baǵytta da jumys isteımiz. Qoldaý kórsetilip jatqanyn sezemiz, endi eńbek ónimdiligimiz de soǵan saı bolmaq», deıdi Kóksý aýdanyndaǵy sharýashylyq ıesi Maqsat
Ábdirahmanov.
Qazir Aqsý qant zaýytynda ónim qabyldaý bastalyp ketti. Bul aýdanda bıyl 2 400 gektarǵa jýyq alqapqa qant qyzylshasy egilgen. 94 sharýa qojalyǵy eńbek etedi. Jaqyn kúnderi kórshiles Sarqan men Alakól aýdandarynyń sharýalary da ónimderin osy zaýytqa jetkizedi. Al resmı túrde qaıta óńdeý jumystary 7 qazanda iske qosylady dep josparlanǵan. Kóksý qant zaýyty bolsa, kúnine 2 myń tonnaǵa deıin ónim qabyldaýǵa qaýqarly. Jergilikti 136 sharýashylyq maýsymǵa belsendi qatysyp otyr. Aqsý qant zaýytynyń qýattylyǵy táýligine 3 myń tonnaǵa jetedi. Aýdandaǵy jas sharýalardyń biri Álıhan Qaıratuly da qant qyzylshasy kásibin alǵa súırep júrgenderdiń qatarynda.
«Ákem de osy daqyldy ósirýmen aınalysqan. Men de sol isti jalǵastyryp kelemin. Qyzylshanyń kútimi aýyr, biraq eńbek aqtalady. Zaýytqa ótkizý baǵasynyń kóterilýi úlken qoldaý boldy. Ásirese sýbsıdııa men arzandatylǵan janar-jaǵarmaısyz mundaı isti alyp júrý qıyn bolar edi. Endi ónimniń sapaly bolyp, shyǵynsyz tapsyrsaq degen oıdamyz», deıdi jas sharýa.
Jetisý oblysy
