Osy rette ǵalymdardyń zamanaýı ázirlemeleriniń mańyzdylyǵyn atap ótken jón. Jýyrda Q.Sátbaev ýnıversıtetiniń ǵalymdary tabıǵı kózderden alynǵan sýdy tazartyp, zalalsyzdandyratyn ári belsendiretin ınnovasııalyq kópsatyly súzgi ázirlep shyǵardy. О́ndiriske daıyn tájirıbelik úlgini tanystyrǵan ǵalymdar pikirine súıensek, ámbabap súzgi taza sý alý múmkindigin barynsha arttyra túsedi.
Joba Ǵylym jáne joǵary bilim mınıstrligi Ǵylym qory men bıznes qaýymdastyǵynyń qoldaýymen júzege asyp otyr. Ǵylymı ázirlemeniń óndiriske enýimen jańa tehnologııalardy qoldanysqa engizý arqyly sý qaýipsizdigin kúsheıtýge bolady. Joba jetekshisi, ınjener-ekolog, PhD Úmbetáli Sársembın aýyz sýdy kópsatyly óńdeýge arnalǵan kópfýnksıonaldy «Akvakóz» qondyrǵysynyń óndiristik erekshelikterin aıtyp berdi.
«Bul tehnologııa úsh kezeńnen turady. Eń aldymen súzgileý men sorbsııa jasaý úrdisi arqyly mehanıkalyq jáne organıkalyq qospalar joıylady. Sodan keıin ozondaý úderisi júredi. Onyń barysynda sý quramyndaǵy mıkroaǵzalar joıylyp, sýǵa antıoksıdanttyq qasıet beredi. Sońǵy kezeńde aýyr metaldar men lastaǵysh qaldyqtar joıylady. Nátıjesinde tap-taza jáne qaýipsiz sý alynady» deıdi Úmbetáli Sársembın.
«Akvakóz» qondyrǵysy – sýdyń tabıǵı mıneraldyq quramyn saqtaı otyryp tazartady. Súzgi arqyly tazartylǵan sýdyń densaýlyqqa paıdasy da zor. Súzgiden ótken sýdyń qyshqyldy-totyqsyzdaný potensıaly –130-150 mV-qa deıin jetedi. Bul kórsetkish sýdyń bıoaktıvtiliginiń kórinisi. Al sýdyń pH deńgeıi 7,4-ke teń.
Jańa qurylǵyny turǵyn úılerde jáne aýyldyq eldi mekenderde, medısınalyq mekemelerde, tamaq ónerkásibinde jáne tótenshe jaǵdaılarda qoldanýǵa bolady.
Almaty
