Bul derekter IýNISEF ár bes jyl saıyn júrgizetin halyqaralyq «MIKS» zertteýiniń nátıjelerine negizdelgen.
IýNISEF — Birikken Ulttar Uıymynyń Balalar qory. Bul — búkil álemde balalardyń quqyqtaryn qorǵaý, ómirin saqtaý jáne ál-aýqatyn qamtamasyz etýmen aınalysatyn eń tanymal uıymdardyń biri.
«MIKS zertteýi kórsetkendeı, Qazaqstanda tárbıeleý barysynda zorlyq-zombylyq ádisteriniń tómendeýi baıqalady. Bul — júıeli profılaktıkalyq sharalar men kúsh-jigerdiń nátıjesi. Endi osy tómendeýge ne sebep bolǵanyn túsinip, olardyń tájirıbesin paıdalaný mańyzdy», – dedi Aaron Grınberg.
Konferensııaǵa Eýropa men Ortalyq Azııanyń 32 eliniń úkimetteri qatysyp jatyr.
Bıyl Qazaqstanda jasóspirimder tarapynan 1600 qylmys tirkeldi. Bul týraly Ishki ister mınıstri Erjan Sádenov málimdegen edi.
Mınıstrdiń aıtýynsha, jasóspirimder qylmystarynyń basym bóligi urlyq, buzaqylyq, tonaý jáne esirtki aınalymyna qatysty derekterden turady.
Sondaı-aq ótken jyly engizilgen túzetýler aıasynda býllıng úshin 256 quqyq buzýshy jaýapqa tartylǵan. Mınıstrlik balalar men jasóspirimder arasyndaǵy quqyq buzýshylyqtyń aldyn alý baǵytyndaǵy jumystardy kúsheıtý qajettigin atap ótti.
Májilis depýtaty Rınat Zaıytov qazirgi balalardyń qatygez ekenin jasyrmady. Oǵan ata-ana tárbıesi tikeleı áser etetinin alǵa tartty.
Qazaqstan boıynsha shamamen 75 kámeletke tolmaǵan bala qamaý oryndarynda jazasyn ótep jatyr. Sonymen qatar, Almaty oblysyndaǵy Jaýgashty aýylynda ornalasqan áıelder kolonııasynda shamamen 600 sottalǵan áıel bar. Sol mekeme janyndaǵy Bóbekter úıinde 50-den astam bala analarynyń qasynda ómir súredi.
