Belarýste balýandar bas júldeni ıelendi

ASTANA. 8 mamyr. Sýrdobalýandardyń joly bolyp tur. Jaqynda olar estý qabileti tómen balýandar arasyndaǵy Belarýstiń ashyq chempıonatyna qatysyp, komandalyq birinshi oryndy ıelendi. Bul týraly egemen.kz tilshisi habarlady. Eske túsirip ótsek, aqpan aıynda bul elge erkin kúres balýandary baryp, Bobrýısk qalasynda Qazaqstannyń kók baıraǵyn jelbiretip, ánuranyn qaıta-qaıta shyrqatyp qaıtqan edi. Bul joly grek-rım kúresindegi jigitterdiń júzi jarqyn boldy. Belarýstiń Grodno qalasynda ótken boz kilem básekesinde bizdiń balýandar qarsylastaryn qırata jeńipti. Sapardan oralǵan Qazaqstan qurama komandasynyń bas jattyqtyrýshysy Erlan Muqajanov Astanadaǵy «Dene múmkindikteri shekteýli tulǵalarǵa arnalǵan sporttyq daıarlaý ortalyǵyna» shákirtterimen birge arnaıy kelip, qýanyshtaryn bólisti. «Belarýstiń ashyq chempıonatyna jeti salmaq boıynsha balýan alyp barǵan edim. Sonyń tórteýi birinshi oryndy, úsheýi ekinshi oryndy ıelendi. Sóıtip, komandalyq esepte bas júlde bizge buıyrdy. Ásirese, 59 kılo slmaqta Eldos Kúzerbaev, 66 kıloda Ǵabıt Igenbaı, 80 kılo salmaq dárejesinde Ábdirahman Ospanov, 130 kıloda Shonký Qaırathannyń beldesýleri jaqsy boldy. Olar bas júldeni ıelendi. Al 75 kılodaǵy Aıbar Nurmuhammed, 85 kılo salmaqtaǵy Qajymuqan Ospanov pen 98 kılodaǵy Asyljan Tájıev ekinshi oryndy ıelendi. Osy kezde shákirtterim babynda júr. Bul rette, kezindegi grek-rım kúresiniń dańqty balýany Dáýlet Turlyqanovqa aıtar alǵysymyz sheksiz. Dáýlet aǵa sýrdo balýandardyń Almatydaǵy «Dostyq» sport kesheninde alańsyz jattyǵýyna jaǵdaı jasaýda. Árıne, biz bul jeńisimizge toqmeıilsýden aýlaqpyz. Balýandar osyndaı jarystarda shyńdalyp, tájirıbe jınaqtaıdy. Sol úshin bizge múmkindik bolsa, syrt elderdegi básekelerden qalmaýymyz kerek. Ásirese, grek-rımde Reseı balýandary myqty. Alla buıyrtsa, jaqynda Armenııada halyqaralyq týrnır uıymdastyrylmaqshy. Endigi kezekte biz sol jarysqa tyńǵylyqty ázirlikti bastaımyz», dedi ol. Dastan Kenjalın. Derek, sýret: egemen.kz